Саўдзельніца парыжскіх тэрарыстаў пакінула Францыю

Меркаваная памагатая тэрарыстаў, якія ўчынілі жорсткія акцыі ў Парыжы 7-9 студзеня, пакінула Францыю.

Пра гэта паведамляе Reuters са спасылкай на крыніцу, знаёмую з сітуацыяй. Як стала вядома журналістам, абвешчаная ў вышук жанчына з'ехала з Францыі яшчэ на мінулым тыдні. Яе маршрут пралягаў у Сірыю праз Турцыю, паведамляе Lenta.ru са спасылкай на крыніцу.

Французская паліцыя шукае 26-гадовую Хаят Бумедзьен, якая, як лічаць следчыя органы, была ці то сяброўкай, ці то напарніцай тэрарыста Амедзі Кулібалі, які захапіў закладнікаў 9 студзеня ў кашэрнай краме ў 20-м раёне Парыжа. Сам Кулібалі быў забіты падчас паліцэйскай спецаперацыі вызвалення захопленых ім закладнікаў, але да гэтага ён паспеў пазбавіць жыцця чатырох грамадзянскіх асоб, а ўжо падчас захопу застрэліць супрацоўніцу паліцыі.

Кулібалі ўзяў закладнікаў адначасова з тым, калі іншыя французскія спецназаўцы праводзілі аперацыю злову і абясшкоджвання братоў Куашы ў горадзе Дамартэн-ан-Гаэль, у 50 кіламетрах ад Парыжа. Браты заселі ў памяшканні друкарні і ўзялі аднаго закладніка. Падчас аперацыі яны былі забітыя, закладнік не пацярпеў.

У сераду, 7 студзеня, адбыўся напад на рэдакцыю сатырычнага часопіса Charlie Hebdo ў Парыжы. Трое ўзброеных мужчын, якімі былі браты Куашы і іх саўдзельнік, які амаль адразу здаўся паліцыі, з крыкамі «Алах Акбар» і «Мы адпомсцілі за прарока» адкрылі агонь па людзях у рэдакцыі і ахоўнікам парадку. Пасля гэтага яны ўцяклі з месца злачынства. Загінулі 12 чалавек, у тым ліку галоўны рэдактар выдання, яшчэ 11 атрымалі раненні.