У Google Translate з'явіцца сінхронны пераклад мовы
- 12.01.2015, 16:11
- 5,698
Google рыхтуецца прадставіць функцыю сінхроннага перакладу мовы ў сваім дадатку Google Translate для Android-прылад.
Пра гэта паведамляе The New York Times. Чакаецца, што абнаўленне ў хуткім часе з'явіцца ў Google Play.
Дадатак зможа распазнаваць вусную мову на некалькіх мовах, а пераклад зробіць у тэкставым выглядзе. Як адзначае The Verge, такая опцыя ўжо прысутнічае ў Google Translate, аднак на гэты раз чакаецца, што пераклад будзе весціся практычна без затрымак, піша Lenta.ru.
У снежні мінулага года кампанія Microsoft прадставіла аналагічную функцыю ў тэставым рэжыме для Skype Translator. Яна дазваляе сінхронна перакладаць размову ў час галасавых званкоў. Пакуль што новаўвядзенне падтрымлівае толькі дзве мовы - гішпанскую і ангельскую.
Google таксама плануе прадставіць сэрвіс для аўтаматычнага перакладу тэкстаў на дарожных знаках і шыльдах. Карыстальнік зможа даведацца значэнне іншамоўных надпісаў з дапамогай навядзення камеры на таблічкі. Такая тэхналогія ўжо рэалізаваная ў дадатку Word Lens, даступным для Android, iOS і акуляраў дапоўненай рэальнасці Google Glass. Раней Google набыла кампанію, якая адказвае за распрацоўку Word Lens, - Quest Visual. Перакладаць надпісы таксама ўмее дадатак TextGrabber + Translator расейскай кампаніі ABBYY.