Крыніца ў ФІФА: «Залаты мяч» атрымае Раналду
2- 12.01.2015, 17:06
- 6,297
Нападнік «Рэала» і нацыянальнай каманды Партугаліі Крышціяну Раналду ў другі раз запар атрымае «Залаты мяч» як найлепшы гулец свету паводле вынікаў 2014 года.
Пра гэта паведамляе «Р-Спорт» са спасылкай на крыніцу ў ФІФА. Паводле вынікаў галасавання партугалец набраў 37,66 адсотка галасоў.
На ўзнагароду таксама прэтэндавалі форвард «Барселоны» аргентынец Ліянэль Месі (15,76 адсотка) і брамнік мюнхенскай «Баварыі» і нацыянальнай каманды Нямеччыны Мануэль Ноер (15,72).
Найлепшым трэнерам года стаў настаўнік зборнай Нямеччыны Ёахім Лёў, які прывёў бундэстым да перамогі на чэмпіянаце свету - 2014 у Бразіліі.
У галасаванні браў удзел 181 трэнер нацыянальных каманд, 182 капітаны зборных, а таксама 181 прадстаўнік СМІ.
Паводле вынікаў мінулага года «Залаты мяч» быў таксама ўручаны Крышціяну Раналду. Да гэтага прыз чатыры разы запар атрымліваў Месі.
Афіцыйна аб перамозе Раналду і Лёва будзе абвешчана на цырымоніі ў Цюрыху, якая пачнецца ў панядзелак, 12 студзеня, у 20:30 паводле менскага часу.