Пераможцаў Кантынентальнага кубка ў Гародні сустрэлі салютам
2- 12.01.2015, 21:58
- 6,894
У Гародні сёння сустракалі хакеістаў клуба «Нёман», якія прыбылі з нямецкага Брэмерхафена з перамогай у суперфінале Кантынентальнага кубка.
Пераможцаў прыйшлі павітаць прадстаўнікі ўладаў, кіраўніцтва клуба, заўзятары і журналісты, паведамляе БелТА.
Каманду сустракалі пад гукі аркестра МНС, у яе гонар запаліліся залпы феерверку. Пераможцам былі адрасаваныя віншаванні і словы падзякі.
Галоўны трэнер клуба Васіль Спірыдонаў выказаў меркаванне, што перамога «Нёмана» ў такім турніры яшчэ раз прадэманстравала, што беларускі хакей здольны на высокія вынікі. Гэта дасягненне для ўсёй краіны.
Хакеісты, якія стаміліся пасля дарогі, але задаволеныя, прымалі віншаванні і фатаграфаваліся з заўзятарамі з прывезеным трафеем.
Гарадзенскія хакеісты датэрмінова сталі пераможцамі суперфіналу розыгрышу Кантынентальнага кубка, які адбыўся 9-11 студзеня, і атрымалі права выступіць у Лізе чэмпіёнаў, дзе яшчэ не гулялі беларускія каманды.