Літва адзначае Дзень абаронцаў свабоды
2- 13.01.2015, 9:55
- 4,402
Сёння ў Літве праходзяць мерапрыемствы ў памяць пра падзеі 13 студзеня 1991 у Віленскай тэлевежы і парламенце.
Па ўсёй краіне адбудуцца шэсці і мітынгі, памятныя службы і цырымоніі з распальваннем вогнішчаў, урокі грамадзянскасці ў школах і выставы. Увечары ў Віленскім кафедральным саборы, у касцёлах і малельных дамах рэлігійных суполак Літвы пройдуць святыя імшы.
Прэзідэнт краіны Даля Грыбаўскайтэ запаліла свечку ў памяць аб ахвярах супрацьстаяння паміж жыхарамі Вільні і савецкімі вайскоўцамі. Відэа апублікаванае на яе старонцы ў сацыяльнай сетцы «Фэйсбук».
13 студзень адзначаецца ў Літве як Дзень абаронцаў свабоды - у памяць аб загінулых 13 студзені 1991 падчас бясчынстваў савецкага войска ў Вільні. Савецкія ўлады тады спрабавала пры дапамозе вайсковай сілы скінуць законны ўрад Літвы, які абвясціў незалежнасць ад СССР.
Пры захопе савецкім войскам і спецчасткамі тэлевежы і Літоўскага радыё і ТВ загінула 14 чалавек, больш за тысячу бяззбройных людзей пацярпела.
Нягледзячы на тое, што вайскоўцам атрымалася захапіць тэлевежу і Літоўскае радыё і ТВ, яны не адважыліся штурмаваць будынак тагачаснай Вярхоўнай рады - Аднаўленчага сейма, які абаранялі тысячы людзей.