Дзярждума РФ разгледзіць закон аб «калектыўнай адказнасці»

Парламентарыі Чачні ўнеслі ў Дзярждуму законапраект, які ўводзіць крымінальную адказнасць для сваякоў баевікоў, якія абвінавачваюцца ў тэрарызме.

«Асобы, якія ўчыняюць тэрарыстычныя акты, і іх сваякі не адчуваюць у належнай меры адказнасці перад грамадствам, у сваю чаргу злачынцы-смяротнікі часцяком ідуць на ўчыненне тэракту і падрыў самога сябе за немалыя грошы, якія атрымліваюць іх блізкія сваякі», - гаворыцца ў тлумачальнай запісцы да законапраекта.

Паводле задумы аўтараў законапраекта, ступень адказнасці будзе залежаць ад «ступені дасведчанасці бацькоў і блізкіх сваякоў аб дзейнасцi асобы, якая ўчынiла злачынства супраць грамадскай бяспекі», паведамляе BBC.

Як растлумачыў спікер парламента Чачэнскай рэспублікі Дукуваха Абдурахманаў, крымінальнай адказнасці падлягаюць бацькі або паўналетнія блізкія сваякі асобы, што ўчыніла тэракт, «калі будзе даведзены факт садзейнічання». У чым можа заключацца такое садзейнічанне, ён не ўдакладніў.

У расейскім крымінальным кодэксе ўжо ёсць артыкул «садзейнічанне тэрарыстычнай дзейнасці», але чачэнскім заканадаўцам яе аказалася недастаткова: іх прапанова агулам сугучная нядаўняй заяве кіраўніка рэспублікі Рамзана Кадырава аб неабходнасці ўвядзення адказнасці для сем'яў баявікоў.

У Дзярждуме выказваюць сумневы ў неабходнасці ўвядзення «калектыўнай адказнасці» на заканадаўчым узроўні, а праваабаронцы расцэньваюць ідэю чачэнскіх дэпутатаў як спробу вяртання ў часы Сярэднявечча.