Украіна і ЗША правялі вайсковыя вучэнні ў Чорным моры
1- 14.01.2015, 14:24
- 13,994
Вайсковы флот Украіны і ЗША правялі сумесныя вучэнні ў Чорным моры ў нядзелю, 11 студзеня.
У іх узялі ўдзел ракетны эсмінец "Дональд Кук" (DDG-75) класа "Арлі Бёрк" і флагман ВМС Украіны фрэгат "Гетман Сагайдачны", піша ZN.ua.
"Вучэнні ўключалі шэраг сцэнарыяў дзеянняў на моры, накіраваных на ўдасканаленне ўмення асабістага складу, у тым ліку перасоўванне персаналу з судна на судна, тактычнае манеўраванне і мадэляванне асіметрычнай абароны ад нападу з прыцягненнем палёту на нізкай вышыні верталёта з фрэгата "Гетман Сагайдачны", - гаворыцца ў паведамленні амерыканскай амбасады ва Украіне.
"Абодва бакі атрымалі каштоўны досвед падчас сённяшніх вучэнняў, якія дапамаглі нам лепш зразумець дзеянні ўкраінскага флоту адначасова з наладжваннем партнёрскіх сувязяў і павышэннем бяспекі рэгіёну", - адзначыў лейтэнант Энтані Мелендэс-Дыяс, памочнік афіцэра ў аператыўных пытаннях эсмінца "Дональд Кук".
У 2015 годзе ўзброеныя сілы Украіны возьмуць удзел у 11 міжнародных вучэннях, сем з якіх пройдуць за мяжой.