Першым намеснікам міністра юстыцыі Украіны прызначылі грамадзяніна Грузіі
17- 14.01.2015, 16:37
- 9,206
Намеснікам міністра юстыцыі Украіны прызначаны паплечнік экс-прэзідэнта Грузіі Міхаіла Саакашвілі Гія Гецадзэ.
Пра гэта Саакашвілі паведаміў у сваім Facebook.
"Мой сябар Гія Гецадзэ быў прызначаны намеснікам міністра юстыцыі Украіны", - паведаміў Саакашвілі.
З ягоных слоў, у грузінскім урадзе Гецадзэ займаў высокія пасады і быў блізкім дарадцам экс-прэзідэнта, паведамляе «РБК-Україна».
Пазней міністр юстыцыі Павел Пятрэнка прадставіў Гецадзэ ў Кабінеце міністраў.
"Хачу вам прадставіць Гію Гецадзэ. Ён намінуецца на пасаду намесніка міністра юстыцыі. Гэта высакакласны спецыяліст, мае велізарны досвед працы ў сістэме дзяржаўнага кіравання Грузіі. Ён быў першым намеснікам міністра юстыцыі ў Грузіі, быў першым намеснікам міністра ўнутраных спраў Грузіі, быў чальцом канстытуцыйнай камісіі Грузіі. На сённяшні дзень ён з'яўляецца дэканам юрыдычнага факультэта Тбіліскага ўніверсітэта", - заявіў Пятрэнка на брыфінгу.
Міністр адзначыў, што прапаноўваў Гецадзэ ўсе пасады ад першага намесніка міністра.
"Гія агучыў сваю пазіцыю, што ён хоча займацца антыкарупцыйнай палітыкай і камітэтам рэформаў, а таксама кадравай камісіяй, якая стане новым механізмам набору кадраў у органы юстыцыі", - заявіў Пятрэнка.
Міністр дадаў, што Гецадзэ падаў дакумент на атрыманне ўкраінскага грамадзянства.
Акрамя таго, Пятрэнка прадставіў яшчэ аднаго грамадзяніна Грузіі, які стане кіраўніком ў Дзяржаўнай рэгістрацыйнай службы Украіны.
"Хачу прадставіць Джаба Эбанаідзэ. Ён быў кіраўніком Нацыянальнага агенцтва публічных рэестраў Грузіі, намеснікам міністра юстыцыі Грузіі, Нацыянальнага бюро выканання. Ён быў кіраўніком мытнай службы і ўкараняў падатковую рэформу ў Грузіі... Цяпер ён даў згоду атрымаць грамадзянства і перайсці на кіруючыя пасады ў сістэму Дзяржаўнай рэгістрацыйнай службы", - заявіў Пятрэнка.