Крычаўскі суд парушыў працэсуальны кодэкс

Парушэнне прызнаў суд вышэйшай інстанцыі.

Журналіст крычаўскай незалежнай газеты "Вольный город" Мікалай Гердзій атрымаў адказ на сваю скаргу ў пракуратуру Крычаўскага раёна ад старшыні Магілёўскага абласнога суда Ігара Прашко, піша ПЦ "Вясна".

Мікалай Гердзій скардзіўся ў пракуратуру на несвоечасовае азнаямленне з пратаколам судовага паседжання аб разглядзе грамадзянскай справы праз іск аб абароне гонару, годнасці, дзелавой рэпутацыі начальніка аддзела ідэалогіі, культуры і спраў моладзі Крычаўскага райвыканкама Марыны Максімавай газеты "Вольный город" і яе журналістаў.

У адказе старшыня Магілёўскага абласнога суда паведаміў журналісту, што ў адпаведнасці з арт. 175 ГПК пратакол павінны быць складзены не пазней за наступны дзень пасля заканчэння судовага пасяджэння або здзяйснення асобнага працэсуальнага дзеяння, а ў складаных справах - цягам пяці дзён.

Справа праз іск Марыны Максімавай да "Вольного города" і журналістаў Мікалая Гердзія, Уладзіміра Кудраўцава і Сяргея Няроўнага аб кампенсацыі маральнай шкоды з вынясеннем пастановы была разгледжаная 08.12.2014 г., а пратакол судовага паседжання аб дадзенай грамадзянскай справе быў зроблены сакратаром судовага пасяджэння толькі 16.12.2014 г., гэта значыць з парушэннем устаноўленых арт. 175 ГПК тэрмінаў.

Ігар Прашко паведаміў журналісту, што ў сувязі з дапушчанымі парушэннямі ў адрас старшыні суда Крычаўскага раёна накіраваны ліст аб неабходнасці няўхільнага выканання работнікамі суда грамадзянскага працэсуальнага заканадаўства і недапушчэнні парушэнняў у далейшай працы.

Таксама старшыня суда напісаў Мікалаю Гердзію, што "законнасць і абгрунтаванасць вынесенай судовай пастановы, а таксама выкананне патрабаванняў грамадзянскага працэсуальнага заканадаўства пры разглядзе справы будзе правераная судовай калегіяй грамадзянскіх спраў Магілёўскага абласнога суда".

Пасля атрымання адказу ад старшыні Магілёўскага абласнога суда журналісты газеты "Вольный город" падрыхтавалі дадатак да сваёй касацыйнай скаргі на пастанову суда Крычаўскага раёна ў справе Марыны Максімавай, у якім выклалі інфармацыю пра гэта і іншых дапушчаных парушэннях. 13 студзеня выдавец газеты "Вольный город" Уладзімір Кудраўцаў накіраваў яго ў судовую калегію грамадзянскіх спраў Магілёўскага абласнога суда.

Нагадаем, што суддзя Крычаўскага раёна Алена Азаранка 8 снежня вынесла пастанову спагнаць з журналістаў газеты "Вольный город" - яе выдаўца Уладзіміра Кудраўцава, рэдактара Сяргея Няроўнага і журналіста Мікалая Гердзія кампенсацыю за нанесеную Марыне Максімавай маральную шкоду ў памеры 7000000 рублёў, аплачаную ёй дзяржпошліну ў памеры 450000 рублёў, і выдаткаў, звязаных з удзелам яе прадстаўніка ў судзе ў памеры 3.600.000 рублёў.

Падставай для падачы іску стаў размешчаны 14 верасня 2014 года на інтэрнэт-сайце газеты "Вольный город" артыкул "Не ў сваім крэсле?". Аналагічны артыкул быў размешчана таксама і ў друкаваным нумары выдання.

Выдавец газеты "Вольный город" Уладзімір Кудраўцаў 17 снежня 2014 года накіраваў касацыйную скаргу ў судовую калегію грамадзянскіх спраў Магілёўскага абласнога суда, у якім просіць судовую калегію скасаваць пастанову і спыніць вытворчасць у справе, спагнаць з Марыны Максімавай выплачаную ім дзяржпошліну ў памеры 225 000 рублёў, а таксама вынесці прыватнае вызначэнне ў адрас суддзі Алены Азаранка за недастатковы прафесіяналізм.

Судовая калегія грамадзянскіх спраў Магілёўскага абласнога суда разгледзіць касацыйную скаргу выдаўца крычаўскай незалежнай газеты "Вольный город" 21 студзеня ў 10-00.