За год у Менску знайшлі 2300 «ілжэпрадпрымальнікаў»

Папоўніўся рэестр камерцыйных арганізацый і ІП з падвышанай рызыкай учынення правапарушэнняў.

Пра гэта паведаміла першая намесніца начальніка інспекцыі міністэрства падаткаў і збораў Менска Надзея Болдырава, паведамляе «Інтэрфакс».

«За 2014 горад Менск напоўніў рэестр суб'ектаў гаспадарання з павышанай рызыкай учынення эканамічных правапарушэнняў 2343 тыс суб'ектамі гаспадарання», - заявіла яна.

Яна нагадала, што гэты рэестр створаны ў адпаведнасці з прэзідэнцкім указам ад 23 кастрычніка 2012 №488 «Аб некаторых мерах папярэджання незаконнай мінімізацыі сум падатковых абавязанняў». Стварэнне і вядзенне рэестра камерцыйных арганізацый і індывідуальных прадпрымальнікаў з павышанай рызыкай учынення правапарушэнняў у эканамічнай сферы даручана Міністэрству падаткаў і збораў.

Болдырава адзначыла: частка лжэпрадпрымальніцкіх структур выяўляецца яшчэ на стадыі рэгістрацыі, што дазваляе ў далейшым павысіць эфектыўнасць праверак.

«У так званы рэестр ілжэпрадпрымальніцкіх структур 333 плацельшчыкі былі ўключаныя яшчэ пры першаснай рэгістрацыі. У далейшым гэтыя звесткі выкарыстоўваюцца ў першую чаргу для таго, каб выбраць суб'екты гаспадарання для правядзення праверкі. Мы бярэм рух па ліку, выяўляем контрагентаў і высвятляем, хто таксама з'яўляецца нядобрасумленным суб'ектам у адносінах да бюджэту, - распавяла спецыяліст. - Усяго ў 2014 годзе з выкарыстаннем рэестра ўдалося давесці 360 схем сыходу ад падаткаабкладання».