Антон Герашчанка расказаў, колькі баевікоў ваююць на Данбасе: «Усё ідзе паводле афрыканскага сцэнару»

Прэзідэнт Расеі Уладзімір Пуцін цяпер наладжвае кіраванне акупаванай тэрыторыяй Данбаса.

Пра гэта ў эфіры 5 канала заявіў народны дэпутат ад «Народнага фронту» Антон Герашчанка, паведамляе ТСН.

«Для гэтага цяпер прыбылі вайсковыя эмісары, адбіраюць тых баевікоў, якіх знішчаюць у зоне АТА. Такім прыкладам было знішчэнне банды Бэтмана 1 студзеня», - адзначыў ён.

Пры гэтым Герашчанка заявіў, што на тэрыторыі акупаванай часткі Луганскай вобласці знаходзіцца да 17 тысяч байцоў так званай «ЛНР».

«Гэта байцы «Луганскай народнай рэспублікі», пэўная колькасць казакоў, іншыя таварышы. Гэтая лічба правераная, вядомая дзякуючы нашай выведцы. Такім чынам, каб ні ў каго не было ілюзій, нам супрацьстаіць цяжкі небяспечны вораг, які мае вялікую колькасць тэхнікі. Так, пад Луганскам цяпер знаходзіцца 84 танкі, для якіх шукаюць экіпажы», - паведаміў палітык.

Ён адзначыў, што жыхары Луганшчыны разумеюць, што ўкраінскія вайскоўцы навучыліся добра страляць, таму танкі тэрарыстаў ператвараюцца ў металалом з трупамі.

«Але тэхнікай Расея сапраўды пазапаўняла за апошні месяц і «ЛНР», і «ДНР»», - дадаў Антон Герашчанка.

Нардэп таксама мяркуе, што танкавыя экіпажы пакуль не набраныя, бо Пуцін не хоча адпраўляць на смерць сваіх вайскоўцаў і спрабуе набраць з мясцовых, выкарыстоўваючы сваіх спецыялістаў для навучання.

«Усё ідзе паводле афрыканскага сцэнару, калі мясцовых наймітаў трэніруюць на мяса», - канстатаваў ён.

У той жа час Антон Герашчанка дапускае, што агулам на акупаванай частцы Данбаса можа знаходзіцца 32 тысячы баевікоў.