Дар'я Домрачава перамагла ў мас-старце ў Рупольдынгу
34- 18.01.2015, 15:45
- 30,024
У агульным заліку Кубка свету беларуская біятланістка - на другім месцы.
Дар'я Домрачава стала пераможцай нядзельнага мас-старту на этапе Кубка свету ў нямецкім Рупольдынгу, піша "Інтерфакс".
Цудоўная хуткасць падчас гонкі дазволіла нашай спартсмэнцы загладзіць недахопы на агнявых пазіцыях. Пасля першай стральбы Даша стала на 19-м месцы, аднак пасля другога агнявога рубяжа ў яе ўжо было 7-мае месца. Да трэцяй стральбы яна выбілася ў лідары, аднак затым рушылі ўслед два штрафныя кругі. 11-я пазіцыя!.. І ўсё ж такі нашая біятланістка засталася верная сабе: да сярэдзіны перадапошняга круга Домрачава зноў узначаліла гонку. На апошняй агнявой мяжы яна адстралялася чыста, астатняе было справай тэхнікі.
На другім месцы - Францыска Пройс з Нямеччыны, на трэцім - Вераніка Віткава з Чэхіі. Надзея Скардзіна паказала 19-ты вынік. Усяго стартавалі 30 удзельніц.
У агульным заліку Кубка свету на першым месцы Кайса Макарайнен (Фінляндыя), у яе 558 ачкоў. У нашай Дар'і Домрачавай - 500. На трэцім месцы ўкраінка Валянціна Семярэнка (452). Беларуска Надзея Скардзіна на 18-тай пазіцыі - у яе 250 ачкоў.