Ярмошынай не дае спакою Парыж

Невыязная старшыня ЦВК зноў згадала сталіцу Францыі ў звязку з санкцыямі.

Увядзенне краінамі Захаду санкцый у дачыненні да сябраў выбарчых камісій не перашкодзіць правядзенню ў Беларусі прэзідэнцкіх «выбараў», заяўляе старшыня Цэнтрвыбаркама рэспублікі Лідзія Ярмошына.

«Члены нашых выбарчых камісій, асноўны іх касцяк - людзі, настолькі цесна звязаныя з дзяржаўнай сістэмай у добрым сэнсе гэтага слова, што менавіта гэта вызначае іх паводзіны і алгарытм дзеянняў. Балазе Айчына для іх большая каштоўнасць, чым магчымасць паехаць у Парыж. Таму на выбарчыя працэсы ўвядзенне заходнімі краінамі санкцый ніяк не ўплывае», - паведаміла Ярмошына ў інтэрв'ю часопісу» Беларуская думка», піша «Інтэрфакс».

Яна адзначыла, што санкцыі распаўсюджваюцца ў асноўным на сябраў Цэнтральнай выбарчай камісіі і кіраўнікоў абласных.

«Вядома, гэта непрыемна... І дзякуй Богу, што ў дачыненні да былых сябраў камісій, у тым ліку цэнтральнай, частка іх скасаваная. Захаванне санкцый выглядала б абсурдна. Дарэчы, я не раз чула ад калег, што яны былі б зняважаныя, калі бы ў дачыненні да іх санкцый не было. Як, маўляў, так: старшыня Цэнтрвыбаркама падпала, а яны не? Значыць, дрэнна працавалі», - сказала кіраўнік ЦВК.

«Для маіх калег санкцыі - гэта такая дробязь! Напэўна, для людзей прагматычных, тых, у каго ўсё вызначаецца грашыма і ільготамі, пазбаўленне магчымасці наведаць краіны ЕЗ выглядае страшна негатыўна. Але на нашых выбарах працуюць тыя, хто вышэй падобных уяўленняў. І галоўныя жыццёвыя каштоўнасці ў нас іншыя», - дадала яна.

Ярмошына таксама адзначыла, што прэзідэнцкія «выбары» імаверна пройдуць 15 лістапада.

Нагадаем, што ўсе выбарчыя кампаніі, якія праходзяць у Беларусі з 1996 года, былі прызнаныя АБСЕ несвабоднымі і несправядлівымі. Праз гэта старшыні Цэнтрвыбаркама Лідзіі Ярмошынай забаронены ўезд у краіны Еўразвязу і ЗША. Пасля падаўжэння санкцый ЕЗ у 2008 годзе Ярмошына заявіла, што шкадуе пра гэта, бо марыць наведаць Парыж.