Шчырасць пуцінскага стратэга

Раней Сяргей Маркаў казаў, што Масква хоча пашырыць «Наваросію», але цяпер ён рэкамендуе прасоўваць інтэграцыю абласцей Данбаса назад ва Украіну.

У мінулы чацвер паміж Масквой і Кіевам павінны былі адбыцца, але не адбыліся мірныя перамовы. У пятніцу афіцыйныя асобы ў абедзвюх сталіцах казалі пра пагрозу поўнамаштабнай вайны ў Данбасе, піша журналістка Ганна Нямцова ў The Daily Beast.

Як адзначае аўтар, неафіцыйны дарадца прэзідэнта Пуціна Сяргей Маркаў у чацвер сказаў у інтэрв'ю выданню: «Ніякіх мірных перамоваў не можа быць, пакуль пэўныя ўкраінскія афіцыйныя асобы адказваюць за прыняцце пастаноў у Кіеве; а яны хочуць уцягнуць Расею ў поўнамаштабную вайну, паколькі ніякім іншым спосабам не могуць захаваць сваю ўладу». Са свайго боку, Турчынаў, выступаючы ў Вярхоўнай Радзе, перасцярог, што «магчымыя аднаўленне ворагам шырокамаштабных вайсковых дзеянняў і наступ пры актыўным удзеле ВС РФ. Наступствам можа стаць поўнамаштабная кантынентальная вайна».

Маркаў заўважыў у інтэрв'ю: «Некаторыя расейскія сілы, магчыма, умяшаюцца, каб выручыць войска Наваросіі ў выпадку, калі ўкраінскія сілы пераўзброяцца і стануць наступаць». «Ён прызнаў, не ўдаючыся ў падрабязнасці, што не менш за два разы, у жніўні і верасні, некаторыя расейскія вайскоўцы знаходзіліся на ўкраінскай тэрыторыі», - піша аўтар.

Маркаў дадаў, што перадае свае парады праз спікера Дзярждумы Нарышкіна, і адзначыў, што не ўсе парады прымаюцца.

Мінулым летам Маркаў казаў, што Масква планавала пашырыць дзяржаву Наваросіі. Але цяпер Маркаў сцвярджае, што апошнім часам змяніў тактыку: «Месяца паўтара таму я парэкамендаваў, што замест Наваросіі нам варта прасоўваць інтэграцыю абласцей Данбаса назад ва Украіну».

Маркаў мяркуе, што пасля такой інтэграцыі ўкраінскія грамадзяне запатрабуюць незалежных расследаванняў такіх інцыдэнтаў, як пажар у траўні ў Адэсе, абстрэл 9 траўня ў Марыўпалі і абстрэл аўтобуса пад Валнавахай на мінулым тыдні. «На афіцыйным узроўні Масква ўсё яшчэ аддае перавагу мірным перамовам», - гаворыцца ў артыкуле. Кіраўнік МЗС Лаўроў сказаў, што Масква ўсё яшчэ зацікаўленая ў пасяджэнні кантактнай групы, якая прапанавала Мэркель, і выказаў надзею, што гарматы зноў замоўкнуць. «На жаль, больш імаверны рокат гармат і ўстановак Град», - завяршаецца артыкул.

Пераклад на беларускую: Inopressa.ru