На АЗС прадаецца дызпаліва толькі экакласа

У Беларусі з 1 студзеня 2015 года на аўтазапраўках прадаецца дызельнае паліва толькі экалагічнага класа К5.

Пра гэта паведаміла прэс-сакратарка канцэрна "Белнафтахім" Марына Касцючэнка, піша БелТА.

"Выконваючы патрабаванні міжнароднага рэгламенту, з 1 студзеня 2015 года беларускія аўтазаправачныя станцыі пераходзяць на продаж дызельнага паліва толькі экалагічнага класа К5 (ДТ-К5) - як зімовага, так і летняга", - падкрэсліла спецыяліст. Тэхнічны рэгламент Мытнага саюза дазваляў абарот на тэрыторыі Беларусі дызпаліва экалагічнага класа К4 да 31 снежня 2014 года.

Плануецца, што кошт на паліва ДТ-К5 захаваецца на ўзроўні ДТ-К4.

Беларускія нафтаперапрацоўшчыкі (ААТ "Мазырскі НПЗ" і "Нафтан") цяпер могуць прапанаваць аўтамабілістам і транспартным прадпрыемствам паліва палепшанай экалагічнага якасці. Яно маркіруецца па еўрапейскаму стандарту Еўра-5, а па класіфікацыі, прынятай на тэрыторыі Мытнага саюза, як клас К5. "Узровень тэхнічнай аснашчанасці нафтаперапрацоўчых заводаў дазваляе ў поўным аб'ёме забяспечыць патрэбнасці беларускага рынку ў паліве адпаведнага класа", - канстатавала Марына Касцючэнка.

Паводле звестак даследаванняў эколагаў, найбольш значнай крыніцай забруджвання атмасфернага паветра з'яўляецца транспарт. На ягоную долю прыпадае больш за 70% валавых выкідаў, таму вельмі важна прымяненне аўтамабілістамі найбольш экалагічна чыстых відаў маторнага паліва, падкрэсліла прэс-сакратарка.

У параўнанні з больш нізкім класам К4 у ДТ-К5 больш жорсткія нарматыўныя параметры па ўтрыманні серы (у аб'ёме, якія не перавышаюць 10 ppm - не больш за 10 міліграмаў на 1 кілаграм, або 0,001%). Гэтае паліва цалкам адпавядае патрабаванням еўрапейскага стандарту EN 590:2009 (Еўра-5). Дзякуючы прымяненню нізкасярністага паліва павялічваецца тэрмін службы каталізатараў і выхлапной сістэмы, значна ўзрастае эксплуатацыйны рэсурс рухавіка аўтамабіля. Дызельнае паліва класа К5 зніжае кіслотна сярністую карозію, да якой найбольш схільныя фарсаваныя хуткаходныя дызельныя рухавікі, устаноўленыя на большасці сучасных легкавых аўтамабіляў.

Як заўважыла Марына Касцючэнка, у Беларусі дзякуючы праведзенай мадэрнізацыі НПЗ ужо ў 2013 годзе адбыўся пераход на забеспячэнне ўнутранага рынку высакаякаснымі бензінамі экалагічнага класа К5, у якіх зменшана ўтрыманне араматычных вуглевадародаў.