Вярхоўная Рада Украіны разгледзіць скасаванне «асаблівага статусу» Данбаса

Вярхоўная Рада Украіны разгледзіць скасаванне закона аб адмысловым парадку мясцовага самакіравання на некаторых тэрыторыях Данецкай і Луганскай абласцей.

Пра гэта заявіў 1 студзеня 2014 старшыня ўкраінскага парламента Уладзімір Гройсман, паведамляе "Інтэрфакс".

"Мы, безумоўна, разгледзім скасаванне гэтага закона. І я думаю, што меркаванне парламента будзе кансалідаваным, але гэта ўжо будзе трохі пазней", - заявіў ён.

Адказваючы на пытанне, ці можа гэта залежаць ад ходу перамоваў у Менску, спікер адзначыў: "Не бачу ўзаемасувязі".

На ягоную думку, прынятыя парламентам законы аб адмысловым парадку самакіравання на Данбасе і аб недапушчэнні пераследу і пакарання асоб-удзельнікаў падзей на тэрыторыі Данецкай і Луганскай абласцей прадугледжвалі эфектыўны механізм рэалізацыі мірнага плана прэзідэнта Украіны Пятра Парашэнкі.

"Паколькі баевікі сарвалі дасягненне гэтай мэты, гэтыя законы страцілі актуальнасць", - дадаў Гройсман.

Раней экс-спікер парламента, цяпер сакратар РНБА Аляксандр Турчынаў зарэгістраваў у Вярхоўнай Радзе ініцыятывы аб скасаванні законаў аб адмысловым парадку самакіравання на Данбасе і недапушчэнні пераследу і пакарання ўдзельнікаў падзей у Данбасе.

Акрамя таго, сваёй пастановай РНБА падтрымаў прапанову прэзідэнта ўнесці на разгляд парламента законапраект аб прызнанні страціўшым сілу закона аб адмысловым парадку самакіравання на Данбасе.

На закрытым паседжанні 16 верасня ўкраінскі парламент прыняў закон Украіны "Аб асаблівым парадку мясцовага самакіравання ў асобных раёнах Данецкай і Луганскай абласцей" і закон "Аб недапушчэнні пераследу і пакарання асоб-удзельнікаў падзей на тэрыторыі Данецкай і Луганскай абласцей".

Першы закон быў падпісаны прэзідэнтам у гэты ж дзень, а другі дакумент кіраўнік дзяржавы так і не падпісаў.