Гомельскі сілавік браў хабар гадзіннікамі і віскі

Начальнік крымінальнай міліцыі УУС Гомельскага аблвыканкама атрымаў новае абвінавачванне.

На пасяджэнні Магілёўскага абласнога суда 20 студзеня ў справе былога намесніка начальніка крымінальнай міліцыі УУС Гомельскага аблвыканкама Вячаслава Іваненкі пракуратура абвінаваціла падсуднага ў злачынным атрыманні грошай і матэрыяльных каштоўнасцяў прыкладна на 70 млн рублёў, піша БелаПАН.

Разгляд справы былога міліцэйскага чыноўніка, які абвінавачваецца ў дачы і атрыманні хабару, махлярстве і саўдзеле ў злачынстве, пачаўся ў абласным судзе 12 снежня мінулага года. У якасці абвінавачанага ў справе таксама праходзіць грамадзянін Расеі Андрэй Космін. 9 студзеня ў працэсе быў зроблены 10-дзённы перапынак для вынясення падсудным новага абвінавачвання.

Згодна з новым абвінавачаннем, якое зачытала прадстаўніца пракуратуры Таццяна Амосава, Космін, які пастаянна пражывае ў Беларусі, неаднаразова здзяйсняў супрацьпраўныя дзеянні. У сувязі з гэтым у органах грамадзянства і міграцыі пачаўся разгляд пытання аб яго высылцы з Беларусі. Іваненка прапанаваў дапамагчы Косміну ў яго пытанні за хабар у дзве тысячы даляраў, якія ён і атрымаў. Хабар у беларускіх рублях па курсе на той момант склаў больш за 19,3 млн рублёў.

Акрамя таго, Космін, які дапамагаў свайму суайчынніку Батурыну, абвешчанаму ў Расеі ў міждзяржаўны вышук у падазрэнні ў махлярстве, прасіў Іваненку садзейнічаць у спыненні расейскімі праваахоўнікамі гэтага вышуку. Для гэтага месцазнаходжаннем Батурына аб'яўляўся Гомель, а сам падазраваны абавязваўся яўкай у падмаскоўныя Хімкі, органы паліцыі якіх былі ініцыятарамі вышуку. У выніку дзеянняў гомельскіх міліцыянтаў пад кіраўніцтвам Іваненкі расейскія паліцэйскія афіцыйна спынілі вышук Батурына. За гэта Космін перадаў Іваненку дарагі наручны гадзіннік, набор дарагога віскі і чатыры тысячы даляраў ЗША, заявіла Амосава. Агульная сума хабару ў гэтым эпізодзе склала больш 50,3 млн рублёў.

Пасля атрымання новага абвінаваўчага заключэння падсудным і іх адвакатам быў прадстаўлены час на азнаямленне.

Адзначым, што цяперашняе абвінавачванне дапаўняе папярэдняе - у яго ўключана атрыманне Іваненкам віскі, што на некалькі мільёнаў рублёў павялічыла агульную суму незаконна атрыманых грошай. З папярэднім абвінавачваннем былы намеснік начальніка крымінальнай міліцыі згаджаўся, не прызнаючы віну паводле эпізода з гадзіннікам. Уручэнне яго ён расцэньваў не як хабар, а як падарунак.

Другі фігурант таксама прызнаваў сваю віну паводле папярэдняга абвінавачвання.