Прэзідэнта Аргенціны абвінавачваюць у забойстве

Забойства пракурора, які выставіў абвінавачванні прэзідэнту Аргенціны Крысціне Фернандэс дэ Кіршнер, выклікала шырокае абурэнне ў грамадстве.

Альберта Нісман павінны быў на закрытым пасяджэнні суда падаць доказы, якія сведчаць супраць аргенцінскага лідара, аднак быў знойдзены мёртвым у сябе ў кватэры, піша Дни.Ру.

Пасля смерці пракурора Альберта Нісмана на вуліцы Буэнас-Айрэса выйшлі пратэстуючыя, якія не вераць у самагубства чалавека, які абвінаваціў высокапастаўленых аргенцінскіх чыноўнікаў. Большасць з іх ускладаюць адказнасць за тое, што здарылася, на прэзідэнта Аргенціны Крысціну Фернандэс дэ Кіршнер. Некаторыя пратэстуючыя адкрыта абвінавачваюць кіраўніка краіны: яны выкрыкваюць лозунгі пра тое, што Крысціна Фернандэс дэ Кіршнер - забойца.

Суддзя Патрысія Булрыч, перад якой пракурор і павінны быў выкласці свае абвінавачванні ў адрас прэзідэнта і кіраўніка МЗС краіны, лічыць версію пра самагубства больш чым сумнеўнай, нягледзячы на заявы судмедэкспертаў. "Некалькі дзён перад сваёй смерцю пракурор быў вельмі актыўны, сфакусаваны на прэзентацыі, якую ён павінны быў паказаць у кангрэсе, на доказах, якія ён планаваў прадэманстраваць. Цяжка паверыць, што ён бы скончыў з сабой", - цытуюць яе Вести.Ru. Патрысія Булрыч адзначыла, што ўсе сабраныя загінулым факты ў любым выпадку будуць захаваныя і далучаныя да справы.

Паводле некаторых звестак, у Альберта Нісмана былі пераканаўчыя доказы таго, што прэзідэнт Аргенціны Крысціна Фернандэс дэ Кіршнер і міністр замежных спраў Эктар Тымерман дамовіліся зняць абвінавачванні з высокапастаўленых іранскіх чыноўнікаў, якія падазраюцца ў датычнасці да тэракту ў габрэйскім культурным цэнтры ў 1994 годзе. Гэты напад нават праз болей чым 20 гадоў застаецца найбуйнейшым тэрарыстычным актам у гісторыі краіны. Тады ахвярамі сталі 85 чалавек, яшчэ больш за 300 атрымалі раны.

Нісман сцвярджаў, што высокапастаўленыя аргенцінскія чыноўнікі дамовіліся зняць абвінавачванні з іранцаў дзеля "геапалітычнага збліжэння з Ісламскай Рэспублікай, аднаўлення паўнавартасных гандлёвых адносін, каб пераадолець наступствы цяжкага эканамічнага крызісу", і паставак "збожжа ў абмен на нафту". Ён таксама распавядаў, што Іран стварыў у Лацінскай Амерыцы падпольную сетку для арганізацыі тэрактаў.

Боку абвінавачвання, не без удзелу ізраільскай сакрэтнай службы "Масад" і ФБР, удалося сабраць доказы, якія сведчаць аб дачыненні да тэракту шэрагу высокапастаўленых грамадзян Ірана. У выніку ўсе іранцы былі адпушчаныя за недастатковасцю доказаў. Са слоў аднаго са сведкаў, які працаваў у іранскай выведцы, Аргенціна атрымала ад іранскага ўрада дзесяць мільёнаў даляраў, каб заблакаваць расследаванне.

Раптоўная смерць Альберта Нісмана стала чарговай загадкай у справе аб выбуху ў габрэйскім культурным цэнтры. Згодна з папярэднім заключэннем судмедэкспертаў, пракурор застрэліўся ў сваёй ваннай з рэвальвера 22-га калібру. Нягледзячы на тое, што на ягоных руках не было выяўлена слядоў пораху, эксперты выключылі дачыненне да смерці Нісмана трэціх асоб.