У Менску пачаўся суд у справе аб жорсткім забойстве Юліі Саламацінай

Сын з дапамогай маці схаваў цела забітай дзяўчыны ў лесе.

У Менску пачаліся слуханні ў справе аб забойстве Юліі Саламацінай (на фота), паведамляе карэспандэнт БелТА з залі суда Фрунзенскага раёна сталіцы.

Як паведамлялася, дзяўчына знікла ў ліпені гэтага года пасля таго, як адправілася на сустрэчу з маладым чалавекам, з якім пазнаёмілася праз адну з сацыяльных сетак. Падчас расследавання крымінальнай справы ў факце яе невядомага знікнення атрыманы звесткі, якія паказвалі на крымінальны характар таго, што адбылося. Да ажыццяўлення комплексу следчых дзеянняў і аператыўна-вышуковых мерапрыемстваў былі прыцягнутыя найбольш дасведчаныя супрацоўнікі УСК горада Менску і ГУУС Менгарвыканкама. У пошуках дзяўчыны актыўна ўдзельнічала грамадскасць.

Праваахоўныя органы ў самыя кароткія тэрміны высветлілі асобу падазраванага ў забойстве Юліі - 25-гадовага менчука. Пры аглядзе ягонай кватэры выяўленыя рэчавыя довады, якія пацвердзілі факт асабліва цяжкага злачынства. Падазроны быў затрыманы разам з маці праз некалькі дзён у Віцебскай вобласці. Распачатая крымінальная справа паводле прыкметаў злачынства, прадугледжанага ч.1 арт.139 Крымінальнага кодэкса - забойства.

Устаноўлена, што абвінавачаны ў стане алкагольнага ап'янення падчас сваркі задушыў дзяўчыну. Аб тым, што адбылося паведаміў маці. Сумесна з ёй, хаваючы сляды забойства, паспрабавалі спаліць вопратку і асабістыя рэчы загінулай, а цела пахавалі ў лясным масіве ў межах горада. Пасля гэтага хаваліся ў лясах Менскай і Віцебскай абласцей.

Цяпер у справе завершаны ўвесь комплекс следчых дзеянняў. Праведзена некалькі дзесяткаў экспертных даследаванняў, у тым ліку дзве комплексныя стацыянарныя судовыя псіхолага-псіхіятрычныя экспертызы, паводле вынікаў якіх сын і маці з'яўляюцца ў стане свядомасці. Яны прызналі сваю віну ў поўным аб'ёме. З моманту затрымання па цяперашні час абвінавачаныя ўтрымліваюцца пад вартай.

Дзеі абвінавачанага кваліфікаваныя па двух складах злачынстваў, прадугледжаных Крымінальным кодэксам, - ч.1 арт.139 (забойства) і ч.1 арт.377 (пашкоджанне афіцыйных дакументаў, учыненае з іншых асабістых памкненняў), абвінавачванай - паводле ч.2 арт.405 (укрывальніцтва асобы, якая ўчыніла асабліва цяжкае злачынства, прылад і сродкаў учынення гэтага злачынства, слядоў злачынства) і паводле ч.1 арт.377 Крымінальнага кодэкса.