Колькасць вайскоўцаў РФ у Данбасе дасягнула максімальнага ўзроўню

Расейская Федэрацыя працягвае ўзмацняць свой вайсковы кантынгент на ўсходзе Украіны.

Пра гэта паведаміў сёння на традыцыйным штодзённым брыфінгу прадстаўнік антытэрарыстычнай аперацыі палкоўнік Андрэй Лысенка, паведамляе Цензор.нет.

Лысенка таксама адзначыў, што на ключавых аператыўных кірунках адбываецца замена груповак баевікоў на вайскоўцаў ВС РФ, агульная колькасць якіх на падкантрольных баевікам тэрыторыях дасягнула самага высокага ўзроўню з пачатку канфлікту на Данбасе - больш за 9 тысяч вайскоўцаў.

"Камандаванне ВС РФ забяспечвае пастаяннае паступленне ў раён баявых дзеянняў жывой сілы і вайсковай тэхнікі, узмоцненай сродкамі СПА, сістэмамі сувязі, выведкі і РЭБ. Праз некантралюемыя ўчасткі ўкраінска-расейскай мяжы ў вялікай колькасці завозяцца боепрыпасы - каля 30-40 грузавікоў у суткі. З гэтай мэтай, а таксама для забеспячэння пастаяннай ратацыі расейскіх вайскоўцаў да мяжы з нашай дзяржавай перадыслакуюцца асобныя падраздзяленні ВС РФ, прынамсі, 20-й гвардзейскай арміі Заходняй вайсковай акругі ВС РФ (штаб знаходзіцца ў Ніжагародскай вобласці)", - паведаміў спікер АТА.