Мужчынская зборная Беларусі ў гандболе не прабілася ў 1/8 фіналу ЧС

Мужчынская зборная Беларусі ў гандболе не прабілася ў 1/8 фіналу чэмпіянату свету, які праходзіць у Катары.

Беларускай зборнай засталося правесці адзін матч - супраць каманды гаспадароў, але ён ужо не мае турнірнага значэння, паведамляе БелаПАН.

Перад заключным турам групавога этапу турнірнае становішча склалася так, што для выхаду ў плэй-оф зборнай Беларусі было неабходна не толькі перамагчы каманду Катара, але і разлічваць, што зборная Чылі здолее перамагчы зборную Бразіліі ці хаця б згуляе з ёй унічыю.

Аднак Бразілія перамагла Чылі - 30:22 і гарантавала сабе чацвёртае месца ў групе нават у выпадку роўнасці ачкоў са зборнай Беларусі, так як у вочным матчы бразільцы атрымалі перамогу - 34:29.

Такім чынам, па-за залежнасці ад зыходу матчу Катар - Беларусь нашая каманда будзе выступаць у турніры за 17-24-е месцы з няўдачнікамі іншых груп. Акрамя таго, зборная Беларусі пазбавілася шанцаў адабрацца на Алімпійскія гульні 2016 года, так як у кваліфікацыйны турнір паводле вынікаў чэмпіянату свету трапяць толькі сем каманд (з 2-га па 8-мае месца, чэмпіён свету атрымлівае прамую пуцёўку).

Матчы 1/8 фіналу ЧС-2015 адбудуцца 25 і 26 студзеня, чвэрцьфіналы пройдуць 28 студзеня, паўфіналы намечаныя на 30 студзеня, а чэмпіён і прызёры ЧС-2015 вызначацца 1 лютага. 30-31 студзеня пройдзе дадатковы міні-турнір за 5-8-мае выніковыя месцы.

Нагадаем, цяперашні чэмпіянат свету - трэці ў гісторыі нацыянальнай зборнай Беларусі. У 1995 годзе ў Ісландыі беларуская каманда заняла 9-тае месца, у 2013-м - 15-тае.