Латвія кліча дыктатарскую Беларусь у Раду Еўропы

Латвія хацела б, каб Беларусь стала сябрам Рады Еўропы.

Пра гэта заявіў дзяржаўны сакратар МЗС Латвіі Андрэйс Пілдэговічс 23 студзеня на прэс-канферэнцыі ў Менску.

«Нам бы хацелася, каб у будучыні Беларусь стала сябрам Рады Еўропы і ўдзельнічала ў працы Еўрапейскага суда праў чалавека», - сказаў ён.

Як паведамляе БелаПАН, Пілдэговічс адзначыў, што і ў краінах ЕЗ, у тым ліку і Латвіі, сітуацыя з правамі чалавека не вырашаная цалкам, узнікаюць і праблемы. «Але ўдзел у працы гэтага суда стварае механізмы для вырашэння пытанняў правасуддзя пры адстойванні праў грамадзянамі, - сказаў ён. - Гэта правільны падыход. Урад Латвіі часцяком церпіць паразу ў такіх судах, мы плацім кампенсацыі, але гэта найбольш эфектыўны шлях (у вырашэнні праблем парушэння праў чалавека. - БелаПАН.)».

Пілдэговічс таксама спадзяецца, што ў 2015 годзе Беларусь далучыцца да Балонскага працэсу. На ягоную думку, беларускія студэнты і выкладчыкі ад гэтага толькі прыдбаюць.