Вікторыя Азаранка прабілася ў 1/8 фіналу Australian Open

Гэта першы ў гэтым сезоне турнір серыі "Вялікага шлема".

Беларуска Вікторыя Азаранка выйшла ў 1/8 фіналу адкрытага чэмпіянату Аўстраліі ў тэнісе (прызавы фонд $31 млн), паведамляе БелТА.

Сёння ў паядынку трэцяга кола адзіночнага разраду Вікторыя, якая займае цяпер 44-е месца ў сусветным рэйтынгу, гуляла супраць чэшскай тэнісісткі Барбары Захлававай-Стрыкавай (23-е месца ў рэйтынгу ВТА) і дабілася перамогі ў двух сэтах з аднолькавым лікам 6: 4.

Паядынак праходзіў пад пякучым сонцам пры 25 градусах і пачаўся з таго, што чэшка здабыла бал на сваёй падачы. Пасля гэтага Вікторыя перамагла ў трох геймах запар, на што чэшка адказала тым жа і выйшла наперад 4: 3. Адчуўшы, што спаборніца знайшла сваю гульню, Азаранка здолела сабрацца і, узяўшы 3 балы запар, завяршыла першы сэт на сваю карысць - 6: 4. Другую партыю Віка пачала вельмі ўпэўнена, калі вяла ў ліку 3: 0. Мабыць, гэта некалькі паслабіла Азаранку, і яна занадта рана паверыла ў лёгкі поспех, чым неадкладна скарысталася спаборніца, якая здолела выраўнаваць становішча - 3: 3. Толькі пасля гэтага беларуска, што называецца, вярнулася ў гульню і зноў выйшла наперад - 4: 3. Потым у яе быў выдатны шанец здабыць пяты бал на сваёй падачы, але яна дазволіла чэшцы ізноў зрабіць нічыю - 4: 4. У драматычнай канцоўцы абедзве тэнісісткі шмат памыляліся, але ў выніку нервы выявіліся мацнейшымі ў Азаранкі, якая давяла гэты напружаны паядынак да перамогі. Сустрэча працягвалася 1 гадзіну 46 хвілін.

У першым паядынку Вікторыя Азаранка ўпэўнена перамагла ў двух сэтах амерыканку Слоан Стывенс (32) - 6: 3, 6: 2, а затым узяла рэванш над сваёй даўняй сяброўкай, восьмай ракеткай планеты Каралін Вазняцкі з Даніі - 6: 4, 6: 2.

Наступнай спаборніцай Вікторыі Азаранкі на кортах "Мельбурн Парку" будзе славацкая тэнісістка Дамініка Цыбулкава (10), якая ў трэцім раўндзе перамагла францужанку Алізі Карнэ (19) - 7: 5, 6: 2.

Лік асабістых сустрэч на турнірах пад эгідай ВТА паміж Вікторыяй Азаранкай і Дамінікай Цыбулкавай - 7-2 на карысць беларускі.

Вікторыя Азаранка ў дзясяты раз гуляе на Australian Open, яна двойчы станавілася трыумфатарам гэтых прэстыжных спаборніцтваў (2012, 2013).

Працягвае выступ у Мельбурне і ветэран беларускага тэніса Максім Мірны. У першым матчы мужчынскага парнага разраду ён разам з гішпанцам Фелісіянам Лопесам перайграў аўстралійскі тандэм Люк Сэйвіл/Джэймс Дакварт - 7: 6 (7: 1), 6: 7 (5: 7), 6: 2, а затым перамог індыйца Роха Бапана і канадца Даніэля Нестара - 7: 5, 6: 3.

Максім Мірны ў 19-ы раз гуляе ў Мельбурне. Яго найлепшым дасягненнем у мужчынскім парным разрадзе з'яўляецца выхад у фінал у 2007 годзе ў дуэце з Ёнасам Б'ёркманам са Швецыі, калі яны саступілі тытул найлепшай пары планеты амерыканцам Бобу і Майку Браянам.

У першым коле спаборніцтваў змешаных пар Максім Мірны з прадстаўніцай Аўстраліі Арынай Радзівонавай саступіў амерыканцы Эбігейл Спірс і мексіканцу Сант'яга Гансалесу - 3: 6, 5: 7.

Адкрыты чэмпіянат Аўстраліі-2015 завершыцца 1 лютага.