Гародніна і садавіна падаражэлі на 10%

Беларускія агуркі ў менскіх крамах прадаюць па 56 тысяч рублёў.

Цяпер беларусы прыцэньваюцца як ніколі. Яшчэ тыдзень таму менчукі скардзіліся на бадай што пустую прылаўкі, пастаўшчыкі - на забарону падвышаць кошты. Але 15 студзеня Мінгандлю дазволіў падымаць іх на тавары з трэціх краін (усе, акрамя Беларусі, Расеі, Казахстана і Арменіі), нагадвае «Комсомольская правда в Беларуси».

- Мы радыя, сітуацыя больш-менш выправілася, - кажа загадчыца сталічнай крамы. - Прылаўкі былі напаўпустымі, сёння ўсё застаўлена. Кошт, вядома, вырас. Але ў сярэднім на 10%.

Прадаўцам не заўсёды выпадае зарыентавацца, і вынікае роскід у коштах.

- У краме «Суседзі» на Каліноўскага ляжаць чэры за 132.500 рублёў. Для каго?! - датэлефанавалася чытачка выдання.

- Гэтыя таматы ад пастаўшчыка прыйшлі ўпершыню, са старым коштам параўнаць не можам, - тлумачыць загадчыца. - Кошт вызначае пастаўшчык, мы маем права зрабіць толькі 25%-ную набаўку. Так што закон не парушылі. Так, тавар задарагі, але астатнія гародніна-садавіна падаражэлі неістотна. Мандарыны і яблыкі зусім прадаем старым коштам.

Журналісты праверылі, як ідуць справы ў іншых месцах. У краме «Еўрапейскі» недалёка ад метро "Усход" усё на прылаўках: беларускія яблыкі, мандарыны, вяндліна, брокалі, пекінская капуста, цыбуля, пятрушка, кроп... Уражвае кошт беларускіх агуркоў - 50 600. Зеляніна таксама крыху падаражэла - у сярэднім на 10%.

- З імпартнымі памідорамі ёсць праблемы, і беларускіх памідораў няма - не сезон. Ёсць гішпанская сліўка за 37 500. Праблемы з пастаўшчыкамі. У іх ёсць абавязанні завозіць тавар, але нават пасля 15 студзеня яны выконваюцца не заўсёды, - патлумачылі ў краме. - Людзі купляюць. Розніца ў некалькі тысяч ужо нікога не палохае.