Microsoft Office 2016 выйдзе ў гэтым годзе

Кампанія Microsoft выпусціць наступнае пакаленне пакета прыкладанняў Office 2016 у другой палове бягучага года.

Пра гэта ў карпаратыўным блогу напісала яе прадстаўнік Джулія Уайт, піша Lenta.ru.

«Мы актыўна працуем над наступнай версіяй прыкладанняў Office для камп’ютараў, якая атрымае назву Office 2016. Мы плануем запусціць фінальную версію Office 2016 у другой палове 2015 года», - адзначаецца ў блогу.

Запланаваны выпуск можна назваць рэверансам Microsoft у бок кансерватыўных карыстальнікаў, якія працуюць з Office на настольных камп’ютарах. Аднак раней на гэтым тыдні на прэзентацыі новых функцый Windows 10 кампанія прадэманстравала, што імкнецца зрабіць Office неад'емнай часткай працы на планшэтах і смартфонах.

Пазней у гэтым годзе Microsoft плануе выпусціць універсальныя прыкладанні Office, аптымізаваныя пад працу на сэнсарных экранах, для карыстальнікаў платформы Windows 10. Яны будуць працаваць на смартфонах, планшэтах, наўтбуках з сэнсарнымі экранамі і іншых тачскрын-прыладах на Windows 10.

Новыя прыкладанні Office будуць бясплатна перадустаноўленыя на смартфоны і планшэты з экранамі дыяганаллю менш за 8 цаляў, якія працуюць на Windows 10. «Вы не будзеце сумаваць па клавіятуры і мышы», - кажуць у Microsoft. Раней кампанія зрабіла бясплатнымі прыкладанні Office на мабільных прыладах на платформах iOS і Android.

Універсальныя прыкладанні Office блізкія ў выглядзе да арыгінальных. Аднак іх адрознівае наяўнасць шэрагу функцый менавіта для працы на сэнсарных экранах - асаблівы рэжым чытання ў Word, жэст змахвання ў Outlook і іншыя.