Мінабароны прызнала героямі Касцюшкі і ягонага ворага Кульнёва
13- 26.01.2015, 15:26
- 16,207
На сайце ўстановы з'явіўся раздзел з прозвішчамі гістарычных дзеячаў, якіх трэба ставіць у прыклад беларускім жаўнерам і афіцэрам
У чэрвені 2014-га "Еўрарадыё" крытыкавала Міністэрства абароны за адсутнасць цвёрдых ідэалагічных арыенціраў. Прынамсі, здзіўляла, што ў складзе камандавання Ўзброеных сіл быў толькі адзін этнічны беларус. А звычайныя жаўнеры, якіх цягам службы нацкоўвалі выключна на "заходняга ворага", не ведалі нават, на якіх герояў арыентавацца, з каго браць прыклад.
З моманту публікацыі ў нашым войску адбыліся змены. Міністрам абароны стаў беларус Андрэй Раўкоў. А на сайце Мінабароны з'явіўся раздзел, прысвечаны беларускім героям розных эпох.
Пачынаецца спіс Усяславам Чарадзеем - полацкім князем і выбітным вайсковым тактыкам. Заканчваецца - курсантам вайсковай акадэміі Дзмітрыем Гвішыяні, які ў 1999 годзе ля Драгічына кінуўся тушыць пасажырскі цягнік і гераічна загінуў. Цікава, што на другім месцы ў спісе герояў - гетман Канстанцін Астрожскі. Адзначана 63 перамогі ягонага войска над татарамі і разгром маскоўскага войска пад Оршай.
"Як узор удалай тактыкі барацьбы з сіламі ворага, якія значна пераўзыходзілі колькасна, у еўрапейскія хрэстаматыі ўвайшла бітва на рацэ Крапіўна ў 1514 годзе", - даецца каментар пра гэтую культавую гістарычную падзею пад партрэтам гетмана.
Ёсць у спісе генерал Тадэвуш Касцюшка - сын беларускай зямлі, які стаў нацыянальным героем Беларусі, Польшчы і ЗША.
Прысутнічаюць у пераліку і вайсковыя начальнікі Расейскай імперыі, з якой Касцюшкі ваяваў, напрыклад Якаў Кульнёў, які з баямі прайшоў усю заходнюю Беларусь, душыў паўстанне ў Польшчы. З часоў Расейскай імперыі прадстаўлены, напрыклад, Казімір Чарноўскі - адзін з першых вынаходнікаў падводнага карабля.
З часоў СССР прадстаўлены адзін з першых касманаўтаў планеты Пётр Клімук, авіяканструктар Павел Сухі, кіраўнік Генштаба Ўзброеных сіл СССР у 1945 Аляксей Антонаў, бацька савецкага дэсанту Васіль Маргелаў. Чаму б ні выбітны дзеяч - этнічны беларус.
Спіс герояў беларускага Міністэрства абароны выглядае грунтоўным і пазнавальным. Праўда, пакуль не прадстаўлены ў ім наш вялікі князь Вітаўт, які ў 1410 годзе разбіў крыжакоў (адна з найважнейшых бітваў у гісторыі сярэднявечнай Еўропы). Няма і Кастуся Каліноўскага, які першым з ваяроў назваў беларусаў беларусамі, пачаў прасоўваць нашу мову ў СМІ і змагаўся за ідэю суверэнітэту і незалежнасці. Напэўна, сённяшнія часы Каліноўскаму б спадабаліся. Няма ў спісе легендарнага партызанскага камандзіра Васіля Каржа - блізкага сябра маршала Жукава.
Спіс гістарычных дзеячаў размешчаны на сайце mil.by у раздзеле "Ваенная энцыклапедыя".
Узнікае пытанне, ці хопіць у беларускіх намеснікаў палітінфарматараў кампетэнтнасці, каб разумна і аб'ектыўна растлумачыць жаўнерам і афіцэрам веліч і значнасць гэтых беларускіх герояў.