Банкі будуць прадаваць у абменніках усю валюту, набытую на біржы

Адпаведную пастанову прыняў Нацбанк.

Амаль месяц, з канца снежня мінулага года, абменныя пункты банкаў працавалі з абароту: гэта значыць, купіць можна было толькі тую валюту, якую здалі кліенты.

Але 26 студзеня Нацбанк прыняў пастанову, паводле якой у абменніках павінна прадавацца і тая валюта, якую банкі купляюць на біржы. Гэтую інфармацыю tut.by пацвердзілі ў некалькіх камерцыйных банках.

Як вынікае з тэксту дакумента, банкам загадана «весці продаж у поўным аб'ёме замежнай валюты, набытай банкамі за кошт уласных сродкаў на таргах ААТ «Беларуская валютна-фондавая біржа», а таксама ў фізічных асоб».

У Нацыянальным банку пастанову не каментуюць.

«У сутнасці, гэта значыць, што банкі павінны набываць на біржы валюту толькі для продажу насельніцтву, а не для падмацавання сваёй валютнай пазіцыі. Гаворка ідзе як пра наяўны рынак, так і аб аперацыях па пластыкавых картках, а таксама для папаўнення валютных рахункаў беларускімі рублямі. Гэтая мера дасць магчымасць задаволіць попыт на наяўным і безнаяўным рынку, - пракаментаваў топ-мэнэджар аднаго з камерцыйных банкаў. - Магу сказаць, што заяўкі банкаў на куплю валюты на біржы задавальняюцца ў поўным аб'ёме».

Трэба адзначыць, што сітуацыя з валютай у абменных пунктах Менска апошнімі днямі палепшылася.

«У аўторак у абменным пункце Ідэя Банка ў гандлёвым цэнтры на Уманскай мне свабодна прапанавалі купіць 400 даляраў, а ў МТБанку - 500 даляраў», - распавядае мянчанка Ганна.

«Ці можаце непасрэдна цяпер купіць любую суму - і 1000, і 1500», - запэўніла касірка ў абменніку каля ЦУМа ўвечары ў аўторак, 27 студзеня.

«Зразумела, можа быць такое, што ў нейкі канкрэтны момант у нейкім абменным пункце не будзе валюты, - прызнае супрацоўнік камерцыйнага банка. - Але праблема не носіць такога складанага характару, як гэта было напярэдадні Новага года».

У банках удакладняюць, што пакуль што насельніцтва па-ранейшаму больш купляе валюты, чым здае.

«Колькі менавіта валюты набываць на біржы, кожны банк пастанаўляе самастойна, зыходзячы са сваіх патрэбаў, - распавядае супрацоўнік яшчэ аднаго камерцыйнага банка. - Ніякіх абмежаванняў і рэкамендацый з боку рэгулятара на гэты конт няма. Але пры гэтым валюта на біржы купляецца ў тым аб'ёме, які патрэбен банку менавіта для продажу насельніцтву. Гэта значыць, калі банк, напрыклад, у дзень прадае па ўсіх аперацыях 1,5 мільёна даляраў, то гэтую суму ён і купіць на біржы».

Нагадаем, на гэтым тыдні большасць беларускіх банкаў палепшылі ўмовы па разліках рублёвымі карткамі за мяжой. У некаторых выпадках істотна павялічыліся ліміты, а ў некаторых - ад абмежаванняў зусім адмовіліся. Таксама банкі часткова аднавілі магчымасць разлікаў рублёвымі карткамі ў інтэрнэце і пачалі папаўняць валютай банкаматы.