11-гадовая дзяўчынка заклала «бомбу» ў кавярні Талачына

У камісіі спраў непаўналетніх Талачынскага райвыканкама разгледзяць незвычайную справу.

Тое, што здарылася некалькі месяцаў таму ў невялікім раённым гарадку, выклікала велізарны перапалох. На адным са столікаў у кавярні крамы «Кулінарыя» афіцыянтка выявіла запіску, піша «Савецкая Беларусь».

У ёй было напісана: «У вас тут бомба. Прыемнага палёту». Працаўніца кавярні тут жа патэлефанавала па нумары «102» і паведаміла пра пагрозу. На месца ў тэрміновым парадку выбылі ўсе аператыўныя службы. Людзей эвакуавалі, памяшканне абследавалі. Ніякай бомбы, вядома ж, не знайшлі. Для высвятлення асобы вінаватага перапалоху правялі экспертызу почырку.

Намесніца пракурора Талачынскага раёна Святлана Малец распавядае:

- Некалькі тыдняў ішла карпатлівая праца пошуку аўтара трывожнага паслання і зборы довадаў. У выніку вінаватую знайшлі ў адной са школ горада. Высветлілася, што запіску на столік кавярні падкінула адзінаццацігадовая дзяўчынка. Яна патлумачыла, што падумала такім чынам пажартаваць.

У суд школьніца не пойдзе - яна не дасягнула таго ўзросту, з якога наступае крымінальная адказнасць.

У пракуратуры адзначаюць, што дзяўчынка расце ў вонкава шчаснай сям'і. Цяпер бацькам, хутчэй за ўсё, давядзецца выплаціць салідны штраф, а таксама пагасіць усе выдаткі, звязаныя з выездам аператыўных службаў на месца здарэння.