Правакацыі баевікоў зрываюць менскія дамоўленасці

У МЗС Украіны канстатавалі рост колькасці абстрэлаў з боку баевікоў.

Апошнім часам істотна павялічылася колькасць абстрэлаў і правакацый з боку незаконных узброеных фармаванняў у Данбасе. Пра гэта гаворыцца ў заяве МЗС Украіны.

Толькі за 2 студзеня было зафіксавана трынаццаць выпадкаў такіх абстрэлаў у раёне населеных пунктаў Дэбальцава, Гнутава, Новагрыгор’еўка, Траецкае, Чарнухіна, Маёрск, Крымскае, а таксама Данецкага аэрапорта. Асаблівы непакой выклікае тое, што баевікі зноў сталі выкарыстоўваць рэактыўныя сістэмы залпавага агню БМ-21 Град, артылерыю і мінамёты.

"Такія правакацыі падтрыманых з расейскага боку незаконных узброеных фарміраванняў сведчаць аб тым, што для іх няма нічога святога - нават у дні набліжэння светлага свята Нараджэння Хрыстова яны працягваюць несці смерць і разбурэнні на ўкраінскую зямлю", - падкрэслілі ў МЗС.

"Разглядаем гэтыя дзеянні як свядомае парушэнне менскіх дамоўленасцей і спробы паставіць пад пагрозу тыя намаганні, якія сёння робяцца Украінай і яе міжнароднымі партнёрамі для выканання мірнага плана прэзідэнта Украіны Пятра Парашэнкі", - гаворыцца ў заяве.

Нагадаем, раней прэзідэнт Украіны Пётр Парашэнка заявіў, што 15 студзеня ён наведае сталіцу Казахстана Астану, дзе адбудзецца сустрэча ў нармандскім фармаце з лідарамі Нямеччыны, Францыі і РФ. "Мой дыпламатычны год пачнецца 15 студзеня ў Астане, дзе будзе праведзена сустрэча ў нармандскім фармаце. Цяпер дадзенае даручэнне міністрам замежных спраў краін нармандскага фармату для падрыхтоўкі парадку дня і праектаў пастаноў на гэты саміт", - паведаміў прэзідэнт.

Казахстан выказаў гатоўнасць да правядзення 15-16 студзеня 2015 у Астане перамоваў што да ўрэгулявання сітуацыі ў Данбасе.

Учора адбылася тэлефонная размова міністра замежных спраў Расейскай Федэрацыі Сяргея Лаўрова з кіраўніком МЗС Нямеччыны Франкам-Вальтэрам Штайнмаерам, Украіны Паўлам Клімкіным і Францыі Ларанам Фабіюсам.

Бакі працягнулі абмеркаванне шляхоў садзейнічання працэсу мірнага ўрэгулявання сітуацыі ў Данбасе, у тым ліку ў рамках рэалізацыі менскіх дамоўленасцей. У гэтай сувязі падкрэслена неабходнасць хутчэйшага склікання чарговай сустрэчы кантактнай групы. Таксама абмяркоўваўся графік далейшых кансультацый у "нармандскім фармаце" на розных узроўнях.