Знішчальнікі NATO перахапілі расейскі самалёт над Балтыйскім морам
18- 30.01.2015, 16:51
- 27,393
Знішчальнікі Typhoon падняліся ў паветра на перахоп праз расейскі Іл-78.
Знішчальнікі NATO вылецелі на перахоп расейскага самалёта Іл-78 над Балтыйскім морам, паведамляюць латвійскія вайскоўцы.
"Знішчальнікі паветранай паліцыі NATO Typhoon падняліся 30 студзеня над Балтыйскім морам на перахоп самалёта Іл-78, які належыць узброеным сілам РФ", - гаворыцца ў паведамленні ў Twitter латвійскага войска, піша zn.ua.
28 студзеня брытанскія знішчальнікі Typhoon былі паднятыя па трывозе ў сувязі са з'яўленнем над Ла-Маншам двух расейскіх бамбавікоў Ту-95 і суправаджалі іх, пакуль тыя не пакінулі зону паветранага кантролю Вялікай Брытаніі. Перахопнікі настолькі блізка падышлі да расейскіх бамбавікоў, што маглі абменьвацца з іх пілотамі знакамі.
Цягам апошніх месяцаў самалёты вайскова-паветраных сіл NATO звыш дзясятка раз перахаплялі расейскія вайсковыя самалёты над Балтыкай. Паводле звестак альянсу, у 2014 годзе самалёты NATO падымаліся ў паветра на перахоп расейскіх самалётаў у тры разы часцей, чым годам раней.
Генеральны сакратар NATO Енс Столтэнберг сказаў, што расейскія самалёты паводзяць сябе больш агрэсіўна, чым раней. У Брусэлі падкрэслівалі, што такія палёты нясуць пагрозу для грамадзянскіх самалётаў.