У «Роснефти» няма чым бурыць свідравіны ў Карскім моры

«Роснефть» адкладае бурэнне другой выведвальнай свідравіны ў Карскім моры з лета 2015 года на лета 2016 года.

Рашэнне пра гэта прынятае пасля таго, як партнёр дзяржкампаніі амерыканскі ExxonMobil быў вымушаны пакінуць праект праз санкцыі ЗША ў дачыненні да Расеі, піша АФН.

Як паведамляе Reuters са спасылкай на крыніцы ў расейскай кампаніі, для аднаўлення бурэння ў ліпені-жніўні 2016 года, Роснефти трэба знайсці новую буравую ўстаноўку да красавіка-траўня 2015 года, кажуць крыніцы.

У верасні мінулага года Роснефть і ExxonMobil абвясцілі аб адкрыцці радовішча ў Карскім моры - першая прасвідраваная на структуры Універсітэцкая-1 свідравіна дала магчымасць даць адзнаку рэсурснай базе праекта на ўзроўні 338 мільярдаў кубаметраў газу і больш за 100 мільёнаў тон лёгкай нафты.

Аднак уведзеная ЗША восенню забарона для амерыканскіх кампаній на выведку і распрацоўку ў Расеі цяжказдабывальных, арктычных і глыбакаводных рэсурсаў прымусіла Exxon пакінуць праект, паставіўшы пад пытанне ягоную жыццяздольнасць.

"У 2016 годзе бурыць будзем адну свідравіну. Калісьці была ідэя, можа быць, працаваць дзвюма свідравінамі, але цяпер будзе пакуль адна", - сказала крыніца, дадаўшы, што нягледзячы на сыход партнёра кампанія не мае намеру адмаўляцца ад свідравання ў сезон наступнага года.

Роснефть афіцыйна не змагла назваць тэрміны бурэння, сказаўшы, што "ў 2015-м годзе забяспечыць выкананне ліцэнзійных абавязацельстваў у геолагавыведцы ў Карскім моры".

"У 2015 годзе бурэння не будзе. Платформы няма, і ўзяць яе ўжо нельга, позна", - сказала крыніца.

Яна ўдакладніла, што праект першапачаткова распрацоўваўся пад нарвежскую буравую West Alpha, якая працавала ў Карскім моры ў 2014 годзе.

Гэтая платформа, вярнуўшыся ў Нарвегію ў сярэдзіне кастрычніка пасля завяршэння будаўніцтва першай свідравіны ў Карскім моры, да гэтага часу закантрактаваная Exxon да ліпеня 2016 года.

Са слоў крыніц, Роснефть у бліжэйшы час пачне тэндэр на выбар буравой і спадзяецца вызначыцца з падрадчыкам да красавіка-траўня 2015 года.

У Роснефти ў 2015 годзе чакаюцца велізарныя выдаткі - трэба аплаціць банкаўскія крэдыты на $19,5 мільярда, якія яна некалькі гадоў таму атрымала для куплі ТНК-ВР.

Блізу $7,14 мільярда з двухгадовага крэдыту міжнародных банкаў дзяржкампанія павінная выплаціць 13 лютага 2015 года, банкіры не чакаюць праблем з вяртаннем крэдыту.