Правасуддзе Брытаніі супраць беспакаранасці Крамля

У Вялікай Брытаніі праводзіцца расследаванне "абставінаў забойства Аляксандра Літвіненкі радыеактыўным палоніем-210 - вельмі незвычайнай атрутай".

Аб гэтым піша карэспандэнт The Wall Street Journal Сахраб Ахмары (пераклад - Inopressa.ru).

Некаторыя аспекты расследавання дыхаюць шпіёнскім баевіком, працягвае аўтар. У сераду, калі паказанні даваў нейкі "Вучоны A1", які курыруе брытанскія ядравыя сілы стрымлівання, журналістаў правялі ў памяшканне, адкуль гэтага сведку было чуваць, але не відаць.

"Падрабязнасці справы ў асноўным больш празаічныя, калі не азадачваюць недарэкаў. Звышсакрэтны "Вучоны A1" прыйшоў, каб паведаміць у паказаннях, што "адзін грам палонію-210 выпраменьвае адзін-шэсць-шэсць, нуль-нуль-нуль, нуль-нуль-нуль , нуль-нуль-нуль, нуль-нуль-нуль альфа-часціц у секунду..." - піша аўтар. "Альфа-часціцы разбурылі арганізм Літвіненкі знутры пасля таго, як 1 лістапада 2006 г. ён выпіў гарбаты з дадаваннем палонію-210", - тлумачыць Ахмары.

Літвіненка сустракаўся ў лонданскім гатэлі з іншым "выпускніком ФСБ", як гаворыцца ў артыкуле, і расейскім бізнэсмэнам. У той жа дзень у яго пачаліся ваніты і панос.

Пры ўспаміне аб мінулым аўтар паведамляе: "Праз многія гады бездакорнай службы ў ФСБ і КДБ Літвіненка і ягоныя калегі па ФСБ правялі ў 1998 годзе прэс-канферэнцыю. Яны сцвярджалі: "ФСБ выкарыстоўваецца некаторымі чыноўнікамі выключна ў іх асабістых мэтах. Яна выкарыстоўваецца для звядзення рахункаў і выканання загадаў прыватных асоб і злачынцаў за грошы" (пераклад з ангельскага арыгіналу на сайце газеты. - Заўвага. Рэд.). "Так інсайдэр агаліў непрыгожыя механізмы новай мафіёзнай дзяржавы, якая прыйшла на змену камуністычнаму рэжыму", - каментуе Ахмары.

Са слоў аўтара, Літвіненку звольнілі з ФСБ і абвінавацілі ў перавышэнні службовых паўнамоцтваў. У 2000 годзе ён збег у Вялікую Брытанію, дзе працягнуў сваю дзейнасць актывіста і, са слоў удавы, пачаў супрацоўнічаць з MI-6.

Брытанская пракуратура ў 2007 годзе завочна выставіла абвінавачванні ў забойстве Андрэю Лугавому. Лугавы і Дзмітрый Коўтун неаднаразова адпрэчвалі абвінавачванні, Масква адмовілася іх экстрадаваць.

"Незалежнае расследаванне - спроба арганізаваць усёабдымнае абвяшчэнне фактаў, якое ў звычайных абставінах адбылося б на працэсе паводле крымінальнай справы, калі б адказнікі "знаходзіліся ў радыусе дасяжнасці" для таго, каб удзельнічаць у гэтым", - піша аўтар. На ягоную думку, расследаванне будзе пераважна сімвалічным, хоць яно і задуманае як скурпулёзна-бесстаронняе.

"Аднак нават гэтая сімвалічная расплата за рэаліі пуцінскай Расеі была адтэрмінаваная з патрабавання брытанскага палітычнага саслоўя, якое вельмі не хацела злаваць Пуціна", - мяркуе Ахмары.

"Цяпер, пасля анэксіі Крыма, націску на Усходнюю Украіну і катастрофы збітага борта 17 Malaysia Airlines сітуацыя змянілася. Вынікам, калі ўсё пойдзе паводле плану, стане поўная публічная справаздача аб справе Літвіненкі. Нарэшце", - так завяршае артыкул аўтар.