Касінец абяцае «аптымізаваць» чыноўнікаў

«Аптымізацыя» колькаснага складу дзяржапарату прадоўжыцца.

Пра гэта заявіў у інтэрв'ю праграме «Галоўны эфір» тэлеканала «Беларусь 1» вечарам 4 студзеня Аляксандр Касінец, прызначаны 27 снежня кіраўніком Адміністрацыі Лукашэнкі, паведамляе TUT.by.

«Сёння пастаўлена такая задача і перад урадам, і перад Адміністрацыяй прэзідэнта, - сказаў Касінец. - Неабходна вельмі сур'ёзна, старанна вывучыць перш за ўсё функцыянальныя абавязкі, колькасць людзей, якія іх выконваюць, і ў канчатковым выніку правесці аптымізацыю, каб не было паўтораў, каб не было людзей, якія проста сядзяць у крэслах, нічога не робяць, праціраюць штаны. Самае галоўнае - гэта эфектыўная, якасная праца, якая будзе выконвацца вельмі хутка, у тэрмін і ў выніку даваць вынік нашай краіне».

Адказваючы на пытанне аб першачарговых напрамках дзейнасці на новай пасадзе, Касінец адзначыў, што прэзідэнтам пастаўленыя задачы ў галіне кадравай палітыкі, эканомікі, дэбюракратызацыя, сацыяльнай палітыкі, міжнародных сувязяў, у забеспячэнні працы з рэгіёнамі краіны, ажыццяўленне функцый кантролю над выкананнем даручэнняў кіраўніка дзяржавы эфектыўна і ў тэрмін.

«Асаблівая ўвага кіраўніком дзяржавы звернутая на працу з людзьмі, каб не было фанабэрыі, непавагі. Звароты грамадзян павінны разглядацца неадкладна, трэба развязваць усе неабходныя пытанні, якія ставяць людзі перад дзяржавай. Таму што самае каштоўнае і галоўнае для нашай дзяржавы - гэта людзі, - заявіў ён.