У Берліне сёння пройдзе сустрэча па Украіне «ў нармандскім фармаце»
2- 5.01.2015, 12:09
- 7,004
Сустрэча па Украіне на ўзроўні дырэктароў замежнапалітычных ведамстваў Нямеччыны, Францыі, Расеі і Украіны адбудзецца сёння ў Берліне.
Расейскі бок будзе прадстаўляць дырэктар другога дэпартамента краін СНД МЗС РФ Віктар Сарокін, паведамляе «Радыё Свабода».
Чакаецца, што на сустрэчы ў так званым нармандскім фармаце будуць абмяркоўвацца пытанні, звязаныя з менскімі дамоўленасцямі ва ўрэгуляванні сітуацыі на ўсходзе Украіны. Не выключана, што гэтыя кансультацыі з'яўляюцца падрыхтоўчымі перад непасрэднымі перамовамі міністраў замежных спраў Расеі, Украіны, Нямеччыны і Францыі. Паводле гэтых дыпламатычных крыніцаў, яна можа адбыцца ўжо 7 студзеня. Пры гэтым месца сустрэчы не ўдакладняецца.
У чэрвені ў Нармандыі падчас святкавання 70-й гадавіны высадкі саюзных войскаў у гэтай французскай правінцыі канцлерка Нямеччыны і прэзідэнт Францыі ўпершыню выступілі пасярэднікамі ў перамовах Масквы і Кіева. З тых часоў перамовы з удзелам прадстаўнікоў Украіны, Расеі, Нямеччыны і Францыі атрымалі назву «нармандскага фармату».
Прэзідэнт Украіны Пётр Парашэнка заявіў аб папярэдняй дамоўленасці аб правядзенні саміту ў «нармандскім фармаце» 15 студзеня ў Астане, дзе ён і лідэры Расеі, Нямеччыне і Францыі абмяркуюць шляхі ўрэгулявання канфлікту на ўсходзе Украіны.
Апошняя сустрэча лідэраў чатырох краін адбылася ў кастрычніку ў Мілане і была прысвечаная ўрэгуляванню газавай спрэчкі паміж Расеяй і Украінай.
Фота: thekievtimes.ua