Беларусь у 2015 годзе павінна выплаціць крэдыторам $4 мільярды

Блізу 3,1 млрд даляраў неабходна будзе пералічыць у кошт выплаты і абслугоўвання вонкавай дзяржаўнай запазычанасці.

Сумы ў абслугоўванні і выплаце ўнутранай валютнай дзяржаўнай запазычанасці складуць блізу 1 млрд даляраў, піша БелаПАН.

Найбольшы аб'ём вонкавых валютных плацяжоў прыпадае на выплату і абслугоўванне дзяржаўнай запазычанасці, што ўтварылася ў сувязі з выпускам Беларуссю пяцігадовых еўрааблігацый у 2010 годзе. У кошт выплаты гэтых абавязацельстваў краіна павінна будзе выплаціць у 2015 годзе амаль 1,2 млрд даляраў.

Акрамя таго, неабходна выплаціць 716,3 млн даляраў міждзяржаўных крэдытаў Расеі. Разам з гэтым запланаваныя выплаты крэдытаў Антыкрызіснага фонду ЕўрАзЭС у 541,2 млн даляраў.

Што да крэдытаў Кітаю і Венесуэле, Беларусь павінна будзе выплаціць у новым годзе 380,4 млн і 121,8 млн даляраў адпаведна.

На 2015 год таксама прыпадаюць выплаты Беларусі ў абслугоўванні і выплаце ўнутранай валютнай дзяржаўнай запазычанасці, якая складзе блізу 1 млрд даляраў.

Паводле звестак Міністэрства фінансаў, на выплату вонкавай дзяржаўнай запазычанасці ў 2015 годзе плануецца накіраваць $1,9 млрд паступленняў бюджэту ад вывазных мытаў нафтапрадуктаў, яшчэ каля 330 млн даляраў плануецца адшукаць на выплаты дзяржаўнай запазычанасці за кошт збірання мытаў ад экспарту беларускай нафты.

Акрамя гэтага, для выканання абавязацельстваў у вонкавай дзяржаўнай запазычанасці ўрад у 2015 годзе мае намер размясціць аблігацыі на 1 млрд даляраў на замежным рынку і пазычыць блізу 800 млн даляраў за кошт унутраных аблігацый.

З улікам пікавых выплат вонкавай дзяржаўнай запазычанасці, якія пачаліся ў 2013 годзе, Нацыянальны банк у асноўных кірунках грашова-крэдытнай палітыкі на гэты год запланаваў нулявы рост золатавалютных рэзерваў.

У 2013 годзе Беларусь накіравала на выплату вонкавай дзяржаўнай запазычанасці 2 млрд даляраў, у студзені-лістападзе 2014-га - 4,23 млрд даляраў.