Літва перадала Украіне элементы ўзбраення

Літва перадала ўкраінскаму войску элементы ўзбраення, пра якія яна прасіла.

Пра гэта паведаміў літоўскі міністр абароны Юозас Алекас, піша ru.DELFI.lt.

«Гэта вайсковыя прыналежнасці, як прыгожа назваў прэзідэнт Парашэнка - элементы ўзбраенняў, гэта тое, што трэба ўзброеным сілам Украіны», - сказаў міністр.

Распавесці аб гэтай дапамозе падрабязней ён адмовіўся.

«Мы падтрымліваем Украіну і гатовыя працягваць дапамагаць ёй», - сказаў Алекас.

У мінулую нядзелю прэзідэнт Украіны Пётр Парашэнка паведаміў, што Літва выканала сваё абяцанне адносна дапамогі ўзбраеннямі.

«Тое, што абяцалі нашы партнёры з Літвы адносна ўзбраенняў, мы ўжо атрымалі. Мы атрымалі першую партыю цёплай вопраткі, ботаў, абсталяванне з Канады, яшчэ чакаем два самалёты. Яшчэ атрымалі партыю з Польшчы, ад іншых партнёраў», - сказаў прэзідэнт.

У лістападзе мінулага года Літва і Украіна дамовіліся супрацоўнічаць у вайскова-тэхнічнай сферы, гэта супрацоўніцтва ахоплівае і пастаўкі элементаў узбраення, сказаў тады прэзідэнт Украіны Парашэнка.

«Мы дамовіліся аб вайскова-тэхнічным супрацоўніцтве, а канкрэтна - пра пастаўкі канкрэтных элементаў ўзбраення узброеным сілам Украіны. Я мяркую, што гэта дэманстрацыя канкрэтнай дапамогі», - сказаў тады ўкраінскі прэзідэнт.