Максім Рыжанкоў стаў памочнікам Лукашэнкі

Першы віцэ-прэзідэнт НАК стаў памочнікам Лукашэнкі ў пытаннях фізічнай культуры, спорту і развіцця турызму.

Аляксандр Лукашэнка падпісаў указ № 656, згодна з якім першы віцэ-прэзідэнт Нацыянальнага алімпійскага камітэта Максім Рыжанкоў надзелены паўнамоцтвамі памочніка Лукашэнкі ў пытаннях фізічнай культуры, спорту і развіцця турызму, паведамляе БелаПАН.

Рыжанкову даручана весці пытанні фарміравання і правядзення дзяржаўнай палітыкі ў галіне фізічнай культуры, спорту і турызму, далейшага развіцця алімпійскага руху ў Беларусі.

Віцэ-прэзідэнта НАК таксама абавязалі: аналізаваць работу дзяржаўных органаў і іншых дзяржаўных арганізацый у галіне фізічнай культуры, спорту і турызму, уносіць прапановы ў яе ўдасканаленні; забяспечваць узаемадзеянне кіраўніка з рэспубліканскімі і міжнароднымі спартыўнымі арганізацыямі (федэрацыямі, саюзамі, асацыяцыямі); уносіць прапановы ў планаванні і правядзенні спартыўна-масавых і спартыўных мерапрыемстваў з удзелам прэзідэнта Беларусь і адказваць за іх падрыхтоўку.

Чыноўнік НАК, які атрымаў паўнамоцтвы памочніка Лукашэнкі, згодна з указам, можа надзяляцца іншымі паўнамоцтвамі ў адпаведнасці з рашэннямі прэзідэнта Рэспублікі Беларусь.

Фінансаванне расходаў, звязаных з ажыццяўленнем Рыжанковым прадугледжаных указам паўнамоцтваў, ажыццяўляецца за кошт сродкаў НАК.

Указ уступіў у сілу 1 студзеня 2015 года.

***

Максім Рыжанкоў нарадзіўся ў 1972 годзе ў Менску. Скончыў юрфак БДУ (1994), Акадэмію кіравання пры прэзідэнце (2003). Працаваў у Цэнтральным апараце Міністэрства замежных спраў (1994-1996), пазней быў супрацоўнікам амбасады Беларусі ў Ізраілі (1996-2000). З 2000 па 2003 - начальнік аддзела АБСЕ і Рады Еўропы МЗС Беларусі. У 2003-2005 - дарадца амбасады ў Польшчы. Далей на год стаў начальнікам упраўлення Амерыкі МЗС Беларусі. З 2006 па 2012 - начальнік упраўлення знешняй палітыкі Адміністрацыі Лукашэнкі. З 2012-га - памочнік Лукашэнкі ў пытаннях фізкультуры, спорту і развіцця турызму.

З'яўляецца адным з распрацоўшчыкаў Канцэпцыі нацыянальнай бяспекі Рэспублікі Беларусь і каментараў да яе. Валодае ангельскай і польскай мовамі.

Займаўся баскетболам і веславаннем на байдарках.