«Белпошту» абавязалі супрацоўнічаць са спецслужбамі

"Белпошту" абавязалі аказваць садзейнічанне ў правядзенні аператыўна-вышуковых мерапрыемстваў у рамках барацьбы са злачыннасцю.

Аляксандр Лукашэнка падпісаў указ N 4 "Аб зацвярджэнні палажэння аб парадку ўзаемадзеяння аператараў паштовай сувязі з органамі, якія ажыццяўляюць аператыўна-вышуковую дзейнасць", паведамілі агенцтву "Интерфакс-Запад" у прэс-службе дыктатара.

Там патлумачылі, указам устанаўліваецца абавязак аператараў паштовай сувязі аказваць садзейнічанне ўпаўнаважаным дзяржаўным органам у правядзенні аператыўна-вышуковых мерапрыемстваў у рамках барацьбы са злачыннасцю.

Таксама ўсталёўваецца парадак доступу да баз даных, аўтаматызаваных сістэм аператараў і інфармацыі, неабходнай пры выкананні аператыўна-вышуковых задач. Такім чынам, фарміруюцца ўмовы для аптымальнага размеркавання нагрузкі паміж суб'ектамі аператыўна-вышуковай дзейнасці, павышэння ступені аператыўнасці мерапрыемстваў, якія праводзяцца, і выкарыстання пры гэтым сучасных аналітычных метадаў, адзначылі ў прэс-службе.

Палажэнне аб парадку ўзаемадзеяння аператараў паштовай сувязі з органамі, якія ажыццяўляюць аператыўна-вышуковую дзейнасць, уступіць у сілу праз тры месяцы пасля афіцыйнага апублікавання ўказа, праінфармавалі ў прэс-службе.