Пінчук заплаціў ашуканцам $5000 за віртуальных шчанюкоў

Жыхара Пінска завабілі бясплатнымі сабакамі рэдкай пароды.

Гэты выпадак унікальны не толькі для горада, але і ўсёй краіны, піша «Вячэрні Брэст».

Са слоў начальніка Пінскага ГАУС палкоўніка міліцыі Валерыя Грынько, пацярпелы выявіў ў сетцы Інтэрнэт аб'яву. У добрыя рукі цалкам бясплатна прапаноўвалі аддаць шчанюкоў пароды «Акіна-Іну». Гэтая парода сабак стала папулярная дзякуючы галівудскага фільму «Хатыка». Неабходна было толькі заплаціць за дастаўку шчанюкоў новаму гаспадару, перавесці невялікую суму грошай праз аплатную сістэму Western Union.

22-гадовы пінчук падумаў, што можа зарабіць на развядзенні і продажы шчанюкоў і выйшаў на сувязь з даўцам рэкламы. І адразу ж трапіўся на вуду. Цягам усяго аднаго тыдня ашуканцы выманілі ў яго 4715 даляраў ЗША. Лісты з просьбамі пералічыць грошы прыходзілі з аэрапортаў Парыжа, Вены, Варшавы, Масквы. Прычыны для пералічэння грошай называліся розныя: на набыццё клетак для транспарціроўкі жывёл, на афармленне дакументаў, страхоўкі, затым апынулася, што шчанюкоў стала больш, а потым адзін памёр. Была абяцаная страхоўка ў суме больш за 20 000 даляраў ЗША. Словам, паўсталі часовыя цяжкасці, а значыць, з пералікам грошай трэба спяшацца. Месцам для перадачы жывёл інтэрнэт-злачынцы вызначылі горад Менск. У прызначаны дзень даверлівы пінчук прыехаў у сталіцу Беларусі і тры дні чакаў прыбыцця шчанюкоў, але віртуальныя ўладальнікі жывёл так і не з'явіліся. Толькі паведамілі, што іх затрымалі ў Кіеве і прасілі грошай на дарогу ў Беларусь. Апошняя просьба перапоўніла чашу цярпення і малады чалавек звярнуўся ў міліцыю з заявай.

Пінскі міжраённы аддзел Следчага камітэта распачаў крымінальную справу паводле ч. 3 арт. 209 КК РБ «Махлярства ў буйнай суме». Праводзяцца аператыўна-следчыя мерапрыемствы па высвятленні ўсіх абставінаў таго, што адбылося. Максімальныя санкцыя гэтага артыкула прадугледжваюць пазбаўленне волі тэрмінам да сямі гадоў з канфіскацыяй маёмасці. Але гэта ў тым выпадку, калі аўтары аб'явы і лістоў будуць знойдзеныя, а віна даказаная ў судзе.