Пад Менскам пачнуць адбіраць лецішчы

У Менскім раёне будуць адбіраць дачныя ўчасткі, якія выкарыстоўваюцца не па мэтавым прызначэнні.

Пра гэта паведаміў сёння журналістам начальнік землеўпарадкавальнай службы Менскага райвыканкама Сяргей Шымук, паведамляе БелТА.

Праверка мэтавага выкарыстання дачных участкаў пад Менскам ужо вядзецца. "Асаблівая ўвага надаецца таварыствам, створаным апошнім часам. Выяўлена каля 50 зямельных участкаў, якія выкарыстоўваюцца неэфектыўна. Пры гэтым хачу звярнуць увагу, што ніхто не будзе прымушаць весці гаспадарку на ўчастку зімой, але па меры набліжэння дачнага сезону такі маніторынг будзе праведзены", - распавёў Сяргей Шымук.

Механізмы канфіскацыі ўчасткаў прапісаныя ў дзеючым заканадаўстве. Напрыклад, калі ўчастак знаходзіцца ва ўласнасці, то ён адбіраецца ў судовым парадку. У некаторых выпадках участак можа быць выключаны з пастановы раённага выканкама. Канфіскаваныя ўчасткі будуць выстаўленыя на аўкцыён.

Начальнік землеўпарадкавальнай службы Менаблвыканкама Віктар Маневіч растлумачыў, што ўладальніку дачнага ўчастка, дзе выяўленыя парушэнні, будзе накіраванае прадпісанне з указаннем тэрмінаў, на працягу якіх неабходна прыступіць да выкарыстання зямлі па мэтавым прызначэнні. "Калі грамадзянін атрымлівае дачны ўчастак, ён павінен разумець, што зямля прадстаўляецца яму не проста так. На працягу года неабходна прыступіць да яе мэтавага выкарыстання. Калі гэтага не адбылося, то можна запускаць працэдуру спынення правоў на гэты ўчастак, - растлумачыў Віктар Маневіч. - Што тычыцца ўчасткаў для вядзення калектыўнага садаводства, то там не абавязкова павінны быць пабудовы. Калі ёсць культурныя расліны, тэрыторыя добраўпарадкаваная і ў належным санітарным стане, то прэтэнзіяў няма".

З 1 студзеня 2015 уведзеная забарона на здзяйсненне ўгод з зямельнымі ўчасткамі, вылучанымі ў прыгараднай зоне Менска і абласных цэнтраў для вядзення калектыўнага садаводства, і з размешчанымі на іх аб'ектамі нерухомасці да заканчэння пяці гадоў з дня дзяржаўнай рэгістрацыі ўзнікнення правоў на такія зямельныя ўчасткі, а таксама забарона на стварэнне ў прыгараднай зоне Менска новых садаводчых таварыстваў, дачных кааператываў.

Акрамя таго, з 1 студзеня свабодныя зямельныя ўчасткі ў садаводчых таварыствах у прыгараднай зоне Менска будуць прадстаўляцца выключна паводле вынікаў аўкцыёнаў.