На выходных - моцны вецер і снегапады

Сёння тэрыторыя Беларусі знаходзіцца пад уплывам актыўных атмасферных франтоў ад цыклона з цэнтрам над Фінляндыяй.

Да канца дня чакаецца снег, мяцеліца, пераважна па ўсходняй палове часам моцны снег. Месцамі мокры снег, галалёд, наліпанне мокрага снегу. На асобных участках дарог галалёдзіца. Вецер паўднёвы з пераходам на заходні моцны парывісты. Максімальная тэмпература паветра складзе -2..+3°С, піша pogoda.by.

10 студзеня тэрыторыя Беларусі будзе знаходзіцца пад уплывам атмасферных франтоў, якія змяшчаюцца з Заходняй Еўропы. Чакаецца воблачнае з прасвятленнямі надвор'е. На большай частцы тэрыторыі пройдуць ападкі (снег, мокры снег, па захадзе з дажджом). Месцамі слабыя туман і галалёд. На асобных участках дарог галалёдзіца. Вецер заходні парывісты, уночы месцамі моцны парывісты. Тэмпература паветра мінімальная ўночы складзе -5 ..+1°С, максімальная ўдзень -2 ..+3°С, па захадзе да + 5°С. Атмасферны ціск уночы і ў першай палове дня будзе расці, у другой палове дня будзе падаць.

У наступныя двое сутак, 11-12 студзеня, чакаецца няўстойлівае ветранае надвор'е. 11 студзеня наша краіна будзе знаходзіцца пад уплывам глыбокага цыклона, які змяшчаецца з поўдня Нарвегіі на Фінскі заліў. Уначы і раніцай на большай частцы, удзень месцамі пройдзе кароткачасовы снег, мокры снег, уначы па поўдні з дажджом. У асобных раёнах чакаецца галалёд, на дарогах галалёдзіца, па поўначы завіруха.

У многіх раёнах моцны парывісты вецер. Тэмпература паветра на працягу сутак -3 ..+4°С. 12 студзеня захаваецца ўплыў цыклона з цэнтрам над Ленінградскай вобласцю. Часам пройдзе снег, мокры снег. Месцамі галалёд, на дарогах галалёдзіца. Уночы ў многіх раёнах, удзень месцамі моцны парывісты вецер. Тэмпература паветра на працягу сутак -3 ..+2°С.