Суд у справе Танкачовай працягнецца 12 студзеня (Відэа)

Сёння ў судзе Першамайскага раёна Менска працягнуўся разгляд скаргі праваабаронцы на высылку з Беларусі.

У судзе Першамайскага раёна Менска 9 студзеня працягнуўся разгляд скаргі кіраўніцы Цэнтра прававой трансфармацыі Алены Танкачовай на пастанову Упраўлення ўнутраных спраў Першамайскага раёна, якой праваабаронцы, якая мае расейскае грамадзянства, загадана пакінуць Беларусь, пішуць «Беларускія навіны».

Як заявіла сёння ў судзе адвакат Ірына Радзькова, прымаючы гэтую пастанову, органы ўнутраных спраў самым грубым чынам вытлумачылі заканадаўства і няправільна яго ўжылі.

Са слоў адваката, прычыны, з якіх замежніка могуць выслаць з Беларусі, выкладзеныя ў законе «Аб прававым становішчы замежных грамадзян і асоб без грамадзянства ў Рэспубліцы Беларусь». Прынамсі, выслаць замежніка можна ў інтарэсах нацыянальнай бяспекі, грамадскага парадку, абароны маральнасці, здароўя насельніцтва, правоў і свабод грамадзян Рэспублікі Беларусь і іншых асоб, адзначыла Радзькова.

Паколькі парушэнне правілаў дарожнага руху, якое паслужыла падставай для прыняцця пастановы аб высылцы, не ўваходзіць у пералік прычын высылкі замежнікаў, пастанову аб высылцы Танкачовай уважаць за законную нельга, заявіла адвакат.

Сёння ў судзе выступілі прадстаўнікі інспекцыі ў грамадзянскай міграцыі Першамайскага раёна горада, таксама быў дапытаны супрацоўнік ДАІ.

Суд паводле скаргі праваабаронцы працягнецца 12 студзеня.

У гутарцы з журналістамі паводле вынікаў пасяджэння Алена Танкачова адзначыла: «Суд ідзе па шляху досыць поўнага даследавання і збору матэрыялаў, фактычна не адмаўляючы ў прыцягненні сведак і далучэнні дакументаў да матэрыялаў справы, а таксама ідзе насустрач пры развязанні пытанняў што да прыцягнення спецыялістаў».

«Думаю, з нармальнага прававога пункту гледжання гэта правільны ход працэсу, - сказала праваабаронца. - З іншага боку, вельмі засмучае факт слабай і нематываванай пазіцыі прадстаўнікоў РУУС Першамайскага раёна. Я чакала хоць нейкіх аргументаў і пісьмовых матэрыялаў, але нічога сур'ёзнага з іх боку не было. Асноўнае пытанне - якім чынам суд будзе інтэрпрэтаваць сабраныя матэрыялы і доказы. Тут прагнозы будаваць не варта, трэба чакаць судовага выраку».

Нагадаем, старшыня Праўлення асветніцкай установы «Цэнтр прававой трансфармацыі» Алена Танкачова была пазбаўленая віду на жыхарства на падставе нязначных перавышэнняў хуткасці, зафіксаваных камерамі. 5 лістапада ў УУС Адміністрацыі Першамайскага раёна Менска адбудзецца разгляд пытання аб прымусовай высылцы праваабаронцы на падставе нібыта пагрозы грамадскаму парадку, якую ўяўляюць гэтыя парушэнні хуткаснага рэжыму. Алена Танкачова пражывае ў Беларусі амаль 30 гадоў, мае тут нерухомасць і пастаянную працу. На працягу 20 гадоў яна і яе арганізацыя аказваюць прафесійную юрыдычную і экспэртную падтрымку некамерцыйным арганізацыямі Беларусі, а таксама людзям у сітуацыях парушэння правоў чалавека.