Расейская авіяцыя ў Сірыі нанесла 30 новых удараў
9- 1.10.2015, 13:48
- 29,416
Авіяўдары былі нанесеныя па сельскай мясцовасці ў наваколлі горада Джыср-эш-Шугур на паўночным захадзе Сірыі.
Расейская авіяцыя 1 кастрычніка нанесла 30 удараў па розных мэтах у Сірыі, паведамляе Reuters са спасылкай на ліванскі тэлеканал Al-Mayadeen.
Паводле звестак канала, авіяўдары былі нанесеныя па сельскай мясцовасці ў ваколіцах горада Джыср-эш-Шугур на паўночным захадзе Сірыі. Горад утрымліваецца некалькімі групамі баевікоў, у тым ліку байцамі "Фронт Ан-Нусра" (аддзяленне Аль-Каіды).
Расейскія самалёты таксама наносілі ўдары па раёнах, якія ўтрымліваюць баевікі альянсу ісламісцкіх арганізацый "Джаіш аль-Фатах" (Войска заваёвы).
Паводле звестак канала, таксама былі абстраляныя некаторыя раёны ў правінцыі Ідліб, Хама, мясцовасць каля гары Завія.
Reuters таксама прыводзіць сведчанне сірыйскага апазіцыйнага СМІ Orient News, якое паведамляе аб абстрэлах месцаў дыслакацыі апазіцыі ў раёне горада Хама.
Расея пачала ваенную аперацыю ў Сірыі 30 верасня. У Мінабароны Расеі заявілі аб 20 ударах па васьмі аб'ектах ІДІЛ у Сірыі.
Краіны Захаду мяркуюць, што расейская авіяцыя наносіць удары не па пазіцыях ісламістаў, а па тэрыторыі, якую кантралюе сірыйская апазіцыя. Праваабаронцы заяўляюць, што ў выніку бамбавання 30 верасня загінулі дзясяткі мірных жыхароў у правінцыі Хомс.