28 сакавiка 2024, Чацвер, 22:58
Падтрымайце
сайт
Сім сім,
Хартыя 97!
Рубрыкі

ЕЗ пастанавіў «замарозіць» на чатыры месяцы санкцыі супраць рэжыму Лукашэнкі

29
ЕЗ пастанавіў «замарозіць» на чатыры месяцы санкцыі супраць рэжыму Лукашэнкі

29 кастрычніка Еўразвяз прыняў пастанову прыпыніць на чатыры месяцы санкцыі ў дачыненні да беларускіх чыноўнікаў.

Пра гэта паведамляе карэспандэнт «Радыё Свабода» ў Брусэлі.

Пастанова ўвойдзе ў дзеянне пасля публікацыі ў афіцыйным выданні Еўразвяза 30 кастрычніка.

Санкцыі прыпынілі ў дачыненні да 171 з 175 чалавек і ўсіх 14 кампаній з так званага «чорнага спісу» Еўразвязу.

Чатыры асобы, супраць якіх санкцыі застаюцца ў дзеянні, гэта тыя, каго Брусэль падазрае ў датычнасці да знікнення былога міністра ўнутраных спраў Юрыя Захаранкі, палітыка Віктара Ганчара, бізнэсоўца Анатоля Красоўскага і журналіста Дзмітрыя Завадскага.

Гаворка ідзе пра былога міністра ўнутраных спраў Беларусі Уладзіміра Навумава, былога кіраўніку адміністрацыі Лукашэнкі Віктара Шэймана, былога камандзіра брыгады спецыяльнага прызначэння Дзмітрыя Паўлічэнкі і былога міністра ўнутраных спраў Юрыя Сівакова. Пастанова аб забароне на ўезд гэтых асобаў у краіны Еўразвязу была прынятая 24 верасня 2004 г на падставе рэзалюцыі Парламенцкай асамблеі Рады Еўропы паводле справаздачы кіпрскага дэпутата Хрыстаса Пургурыдэса аб палітычна матываваных знікненьнях людзей у Беларусі.

Нагадаем, урад Беларусі не выканаў ніякіх рэкамендацый міжнародных арганізацый, якія тычацца правоў чалавека і вяршэнства закона, становішча з якімі толькі пагоршылася пасля жорсткіх дзеянняў уладаў зімой 2010 - увесну 2011 гадоў. Сітуацыя ў Беларусі перарасла ў зацяжны крызіс, дзе парушэнні правоў чалавека носяць «сістэмны і сістэматычны» характар, з вызначэння Спецыяльнага дакладчыка ААН аб сітуацыі з правамі чалавека ў Беларусі. Гэта выкліканае прыняццем шэрагу рэпрэсіўных законаў і ўжываннем усё больш рэпрэсіўных захадаў, якія руйнуюць асноўныя свабоды.

Не былі расследаваныя жорсткія дзеянні ўладаў пасля прэзідэнцкіх выбараў 19 снежня 2010 года, уключаючы паліцэйскі гвалт у дачыненні да дэманстрантаў, затрыманне больш як 700 чалавек, катаванні і бесчалавечнае абыходжанне з затрыманымі, несправядлівыя суды, у выніку якіх было асуджана больш за 40 чалавек, прызнаных палітычнымі вязнямі.

Урад Беларусі адмаўляецца ад супрацоўніцтва з міжнароднымі праваабарончымі механізмамі ў найбольш важных пытаннях правоў чалавека і не прызнае мандат Спецыяльнага дакладчыка ААН аб сітуацыі з правамі чалавека ў Беларусі.

Ніводзін былы палітычны зняволены не быў рэабілітаваны.

Напісаць каментар 29

Таксама сачыце за акаўнтамі Charter97.org у сацыяльных сетках