Лукашэнка просіць вайскоўцаў абараніць яго ад «хаосу»
117- 30.10.2015, 14:58
- 51,038
(абноўлена) Дыктатар запатрабаваў удасканальвання сістэмы абароны краіны.
Такую задачу паставіў Аляксандр Лукашэнка, выступаючы 30 кастрычніка ў менскім Доме афіцэраў на аператыўным зборы каманднага складу Узброеных сіл Беларусі, піша БелТА.
«Як кіраўнік дзяржавы я не бачу сэнсу быць уцягнутымі ў гульню мускуламі нашых заходніх і ўсходніх суседзяў. Не час, і гэта не трэба. Трэба займацца рэальнай абаронай, а не на паказ. І вось тут мы гатовыя з Расеяй на ўсялякія мерапрыемствы», - заявіў Лукашэнка.
Дыктатар заклікаў прысутных разлічваць на ўласныя сілы.
«Паглядзіце вакол, - звярнуў увагу Лукашэнка. – Ніводзін сучасны канфлікт не пачынаўся ўварваннем замежных войск на тэрыторыю той ці іншай дзяржавы. Цяпер ужываюцца больш вытанчаныя спосабы ўздзеяння, але сцэнар адзін і той жа - раскідаць дзяржаву знутры. Таму галоўная задача ў тым, каб забяспечыць сацыяльна-палітычную стабільнасць унутры краіны, не дапусціць хаосу ды ўсялякай дэстабілізацыі абстаноўкі».
У Беларусі ёсць дзяжурныя сілы СПА, у складзе якіх ёсць і расейскі кампанент, нагадаў дыктатар. На аэрадроме ў Баранавічах штодня знаходзяцца беларускія экіпажы МіГ-29 і расейскія Су-27. «Яны са сваёй задачай - ахова дзяржмяжы ў паветранай прасторы спраўляюцца, у тым ліку ў інтарэсах абароны Расейскай Федэрацыі», - падае словы Лукашэнкі тэлеканал ОНТ.
«Мы не ўтойваем, што ў выпадку развязвання вайсковай агрэсіі супраць Беларусі, лічы і супраць Расеі, будзе ўжытая супольная рэгіянальная групоўка войскаў. А значыць, акрамя нашых Узброеных сіл, паводле плану, гэта таксама не сакрэт, у краіну будуць перакінутыя значныя сілы расейскага войска, у тым ліку значная колькасць расейскай авіяцыі. Але ў выпадку канфлікту або блізкага канфлікту», - сказаў ён.
Лукашэнка адзначыў, што аэрадромы ў Беларусі ўтрымліваюцца ў нармальным стане і гатоўнасці прыняць сотні самалётаў, у тым ліку і Расейскай Федэрацыі для забеспячэння абароны Расеі ды Беларусі.
«Гэта значыць паднятая розгалас у сродках масавай інфармацыі мае, я мяркую, чыста палітычны характар», - заявіў Лукашэнка.
На ягоную думку, у выпадку размяшчэння расейскай базы на беларускай тэрыторыі Беларусь, як і Расея, будзе мець больш мінусаў, чым плюсаў.
Кіраўнік назваў відавочнымі няздольнасць і нежаданне лідараў вядучых дзяржаў несці адказнасць за свае пастановы.
«Пад фальшывымі лозунгамі пра пагрозы для сусветнай супольнасці і надуманымі прычынамі для насаджэння «дэмакратыі» знішчаныя Ірак ды Лібія. Паўночная Афрыка і Блізкі Усход пагружаныя ў хаос. Беспрэцэдэнтныя ў сваёй вытанчанасці крокі робяцца супраць Сірыі», - адзначыў правадыр.
«Вынікі такой «дэмакратызацыі» сумна вядомыя, - сказаў Лукашэнка. - Сёння мільёны мігрантаў рынулі на еўрапейскі кантынент, што стала вострай міжнароднай праблемай».
Дыктатар таксама выказаўся і пра падзеі ва Украіне.
«Перш за ўсё, нашую краіну не можа не закранаць крызіс ва Украіне, - мяркуе Лукашэнка. - Мы ведаем рэжысёраў і рэальных удзельнікаў учыненага там дзяржаўнага перавароту і распачатай пасля гэтага вайны».
Дыктатар падкрэсліў, што захоўваецца патэнцыял і актыўнасць радыкальных нацыяналістычных груповак, якія то тут, то там імкнуцца сілавымі метадамі змагацца за перадзел сфер уплыву ў бізнэсе. Расце злачыннасць і некантралюемы распаўсюд зброі. Адзначаюцца спробы яе ўвозу на нашую тэрыторыю.
Лукашэнка выказаў меркаванне, што відавочная замежнапалітычная пераарыентацыя нашай паўднёвай суседкі ў бок Захаду можа прывесці да размяшчэння на яе тэрыторыі замежных вайсковых кантынгентаў.