Аляксей Кудрын прагназуе падзенне заробкаў у Расеі на 10%
9- 5.10.2015, 8:45
- 13,795
Былы міністр фінансаў Расеі выказаў здагадку, што налета заробкі ў яго суайчыннікаў будуць падаць, а ўзровень беспрацоўя - расці.
Пра гэта Аляксей Кудрын заявіў у інтэрв'ю радыёстанцыі Business FM, піша РБК.
«Беспрацоўе, можа быць, нават крыху павялічыцца», - сказаў ён.
Экс-кіраўнік Мінфіна адзначыў, што цяперашняя эканамічная сітуацыя ў краіне, у адрозненне ад 2008-2009 гадоў, характарызуецца «сур'ёзным падзеннем рэальных даходаў насельніцтва». Паводле яго прагнозу, рэальныя даходы насельніцтва ўпадуць амаль на 7%, а заробкі - на 10% у рэальным выразе.
Кудрын таксама адзначыў, што хваля звальненняў у краіне «яшчэ некаторы час працягнецца». «У нас многія прадпрыемствы да восені гэтага года ўважалі, што вось-вось пачнецца рост, пераб'ёмся, і тым самым адпраўлялі людзей у летнія адпачынкі, прыпынялі вытворчасць або прапаноўвалі няпоўны працоўны дзень. Але цяпер яны зразумелі, што сітуацыя не паляпшаецца, і пачынаюцца масавыя звальненні - вось з гэтай восені», - сказаў ён.
2 кастрычніка былы кіраўнік Мінфіна выказаў здагадку, што налета рост УБП Расеі можа скласці ад 0,5% да мінус 1%. Датычна падзення УБП у 2015 годзе Кудрын заявіў, што яго прагноз застаецца ранейшым. «У пачатку года я казаў, што пры кошце нафты ніжэй за 60 даляраў [падзенне эканомікі] будзе 4%. Так і ёсць», - сказаў ён.