На мяжы затрымалі актывіста БХД
- 5.10.2015, 14:37
- 16,849
Агляд рэчаў Валерыя Білібухі праводзілі прадстаўнікі адразу трох устаноў.
У пункце пропуску Макраны на беларуска-ўкраінскай мяжы 4 кастрычніка блізу 15:00 быў спынены для дэталёвага надгляду адзіны дэмакратычны дэпутат у Беларусі, чалец аргкамітэта БХД Валерый Білібуха з Бярозаўскага раёна.
Пра гэта сайту charter97.org паведамілі ў прэс-службе аргкамітэта для стварэння партыі "Беларуская хрысціянская дэмакратыя".
З ягоных слоў, ён ужо збіраўся выязджаць з пункта пропуску, як яго перанакіравалі на дэталёвы агляд. Правялі яго прадстаўнікі адразу трох устаноў: памежнікі, мытнікі і супрацоўнікі ў чорнай форме, міністэрства якіх дэпутат не высветліў.
Кантралёраў цікавілі дакументы, якія знаходзіліся ў аўтамабілі Валерыя Білібухі: пастановы з'езда і Нацыянальнай рады БХД, спіс чальцоў Нацыянальнай рады, лісты, незалежныя выданні і нават чарнавік дэпутата. На асабістыя рэчы, якія былі ў аўто, яны ўвагі не звярталі.
Дагляд доўжыўся амаль 40 хвілін, пасля чаго Валерыя Білібуху адпусцілі. Усе дакументы яму вярнулі.