Лінас Лінкявічус: Парушаючы паветраную прастору Турцыі, РФ гуляе з агнём
5- 7.10.2015, 11:00
- 17,598
Расея гуляе з агнём, калі парушае паветраную прастору Турцыі, якая з'яўляецца сябрам NATO.
Пра гэта заявіў міністр замежных спраў Літвы Лінас Лінкявічус, паведамляе Delfi.lt.
Са слоў міністра, Расея выкарыстоўвае традыцыйную тактыку блефу і тэставання, аднак на гэты раз з ёй ніхто не мае намеру мірыцца.
«Калі будзе рэакцыя, то якая? Калі яна недастаткова адэкватная, прадоўжацца далейшыя дзеянні і крокі. Гэта мы бачылі ўжо не толькі ў Сірыі, але і ўсюды. На гэты раз гэта гульня з агнём», - падкрэсліў Лінкявічус.
«На гэты раз, наколькі мне вядома ад калегаў, гэта не будзе заахвочвацца. Я ніколькі не сумняваюся, калі такія безадказныя ўчынкі будуць працягвацца і далей, магчымыя і трагічныя падзеі, могуць быць і збітыя самалёты, калі яны далей будуць парушаць паветраную прастору NATO», - адзначыў ён.
Як паведамлялася, расейскі вайсковы самалёт парушыў паветраную прастору Турцыі паблізу сірыйскай мяжы ў суботу, 3 кастрычніка.
МЗС Турцыі выклікала пасла Расеі ў Анкары, каб выказаць яму пратэст у сувязі з парушэннем.
Пасольства Расеі ў Турцыі пацвердзіла факт парушэння расейскім вайсковым самалётам турэцкай паветранай прасторы, але патлумачыла, што адбылося гэта праз дрэнныя ўмовы надвор'я.
У аўторак Турцыя паўторна выклікала расейскага пасла для тлумачэнняў з нагоды другога парушэння паветранай прасторы краіны, якое адбылося ў нядзелю, 4 кастрычніка.