Пентагон: ЗША не будуць супрацоўнічаць з РФ у аперацыях у Сірыі, пакуль Крэмль не зменіць сваю стратэгію
1- 7.10.2015, 18:45
- 15,261
ЗША не збіраюцца супрацоўнічаць з Расеяй у пытанні аб вайсковых аперацыях у Сірыі да таго часу, пакуль Крэмль не зменіць стратэгію вядзення аперацыі.
Як паведамляе "Інтэрфакс-Украіна", пра гэта заявіў міністр абароны ЗША Эштан Картэр.
"Я ўжо казаў, што, на наш погляд, у Расеі няправільная стратэгія. Яна далей наносіць ўдары па цэлям, якія не маюць дачынення да "ісламскай дзяржавы". Мы мяркуем, што гэта - фундаментальная памылка. Насуперак таму, што сцвярджае Расея, мы не згаджаліся супрацоўнічаць у барацьбе супраць "Ісламскай дзяржавы" дагэтуль, пакуль яна мае няправільную стратэгію і наносіць ўдары па гэтым цэлям", - падкрэсліў кіраўнік Пентагона.
Таксама Картэр дадаў, што ЗША ўстурбаваныя дзеяннямі сірыйскіх урадавых войскаў.
"А Расея дапамагае ім (сірыйскім вайскоўцам. - Рэд.). І менавіта таму мы ўважаем дзеянні РФ у Сірыі памылковымі", - заявіў ён.
30 верасня Крэмль атрымаў дазвол ад Савета Федэрацыі весці вайсковыя дзеянні на тэрыторыі іншых дзяржаў. У гэты ж дзень расейская авіяцыя нанесла першы авіяўдар па аб'ектах у Сірыі. Пасля гэтага расейская авіяцыя рэгулярна праводзіць бамбаванні тэрыторыі краіны, а мінабароны РФ заявіла аб тым, што плануе больш інтэнсіўныя авіяналёты.
5 кастрычніка ў заходніх СМІ з'явілася інфармацыя аб падрыхтоўцы расейскімі вайскоўцамі наземнай аперацыі ў Сірыі. Прэс-сакратар расейскага прэзідэнта Уладзіміра Пуціна Дзмітрый Пяскоў зняпраўдзіў інфармацыю аб наземнай аперацыі вайскоўцаў РФ у Сірыі і заявіў, што канчатковай мэтай усіх вайсковых дзеянняў Расеі з'яўляецца палітычнае ўрэгуляванне сітуацыі ў гэтай краіне.
На думку агенцтва Reuters, вайсковае ўмяшанне Расеі ў Сірыі было запланаванае ў ліпені, падчас візіту ў Маскву іранскага генерала Касема Сулеймані, камандзіра элітнага вайсковага падраздзялення "Эль-Кудс", які падаў план, здольны дапамагчы змяніць ваенную сітуацыю на карысць Асада.