Мітынг у Менску: Дзе мае 1000 даляраў?

Удзельнікі мітынгу за годную працу запатрабавалі ад уладаў новай эканамічнай палітыкі.

Такое патрабаванне ўтрымліваецца ў рэзалюцыі, прынятай актывістамі незалежных прафзвязаў - удзельнікамі мітынгу за годную працу, які прайшоў 7 кастрычніка ў мінскім парку Дружбы народаў, піша БелаПАН.

Новы эканамічны курс, на думку прафзвязных актывістаў, павінен «забяспечыць развязання праблем занятасці, стварэння новых працоўных месцаў, мадэрнізацыі вытворчасцяў, істотнага павышэння заробкаў і даходаў працоўных, забеспячэння бяспечных умоў працы».

Удзельнікі мітынгу заявілі, што яны «паслядоўна і няўхільна» выступаюць за тое, каб працаўнікі краіны мелі права на годную працу «ва ўсіх яго вымярэннях». Яны адзначылі, што ўлады не забяспечваюць «асноватворныя прынцыпы і нормы годнай працы, выпрацаваныя Міжнароднай арганізацыяй працы», між іншым «паслядоўна зніжаецца і без таго вельмі нізкі ўзровень заробкаў, які пакідае за рысай беднасці многія тысячы працоўных і іх сем'і».

Перад краінай, адзначылі прафактывіста, паўстае праблема няпоўнай занятасці і прагрэсіўнага беспрацоўя, але ўлады «не знаходзяць патрэбным ні прызнаваць праблему, ні тым больш прымаць меры ў стварэнні новых рабочых месцаў».

«На фоне практычнай бяздзейнасці ўлад працягваюць заставацца крытычнымі ўмовы, у якіх даводзіцца працаваць сотням тысяч працоўных, вымушаных падвяргаць сур'ёзнай рызыцы сваю бяспеку і здароўе», - гаворыцца ў дакуменце.

Сур'ёзнай праблемай на шляху паляпшэння працоўнай сферы, на думку прафактывістаў, сталі дэкрэты прэзідэнта №29 аб абавязковых тэрміновых працоўных кантрактах, №9 – што забараніў работнікам дрэваапрацоўчай прамысловасці звальняцца да заканчэння мадэрнізацыі прадпрыемстваў, №5 - наклаў дадатковую адказнасць на работнікаў і наймальнікаў, №3 - фактычна вярнуў у краіну адказнасць за дармаедства.

«Мы намагаем на неадкладным скасаванні гэтых дэкрэтаў, бо іх дзеянне абражае чалавечую годнасць працоўнага і робіць немагчымым дасягненне годнай працы ў краіне», - падкрэслілі аўтары рэзалюцыі.

Мітынг за годную працу, прымеркаваны да Сусветнага дня барацьбы за годную працу, які традыцыйна адзначаецца 7 кастрычніка, арганізаваў Беларускі кангрэс дэмакратычных прафзвязаў. У ім бралі ўдзел блізу 70 менскіх і рэгіянальных актывістаў прафзвязу - сябры БКДП, сярод якіх Беларускі незалежны прафзвяз, Свабодны прафзвяз Беларускі, Свабодны прафзвяз металістаў і Прафзвяз працаўнікоў радыёэлектроннай прамысловасці.